வெஸ்ட் இண்டீஸில் சுற்றுப்பயணம் மேற்கொண்டுள்ள இந்திய அணி 2 டெஸ்ட் போட்டிகள், 3 ஒரு நாள் போட்டிகள் மற்றும் 5 டி20 போட்டிகள் கொண்ட தொடரில் விளையாடி வருகிறது. இதில், முதலில் நடைபெற்ற டெஸ்ட் தொடரை 1-0 என்ற கணக்கிலும், 3 போட்டிகள் கொண்ட ஒரு நாள் தொடரை 2-1 என்ற கணக்கிலும் இந்திய அணி கைப்பற்றியுள்ளது.

இதனைத் தொடர்ந்து தற்போது 5 போட்டிகள் கொண்ட டி20 தொடர் நடைபெற்று வருகிறது. இதில் யாரும் எதிர்பாராத வகையில் முதல் 2 போட்டிகளிலும் இந்திய அணி தோல்வியை தழுவியுள்ளது. இதன் மூலம் 5 போட்டிகள் கொண்ட டி20 தொடரில் வெஸ்ட் இண்டீஸ் அணி 2-0 என்ற கணக்கில் முன்னிலையில் உள்ளது.

இந்த நிலையில் தொடரை நிர்ணயிக்கும் 3வது டி20 போட்டி இன்று இரவு 8 மணிக்கு நடைபெறுகிறது. இன்றைய போட்டியில் வெஸ்ட் இண்டீஸ் அணி வெற்றி பெற்றுவிட்டால் தொடரை கைப்பற்றி விடும் என்பது குறிப்பிடத்தக்கது.

மேலும், வெஸ்ட் இண்டீஸ் அணி மீதமுள்ள போட்டிகளில் ஒரு போட்டியில் வென்றாலும் கூட தொடரை கைப்பற்றி விடும் என்பதால், இந்திய அணி கட்டாய வெற்றி பெற வேண்டிய சூழலில் உள்ளது.

அதன் காரணமாக பாண்டியா தலைமையிலான இளம் இந்திய அணி தொடரை தக்க வைக்க கடுமையாக போராடும் என்பதாலும், சொந்த மண்ணில் தொடரை கைப்பற்ற வெஸ்ட் இண்டிஸ் அணி முனைப்பு காட்டும் என்பதாலும் இன்றைய போட்டி விறுவிறுப்பாக அமையும் என ரசிகர்களால் எதிர்பார்க்கப்படுகிறது.