சென்னை: தீபாவளி பண்டிகையை முன்னிட்டு, புதிய ஆடைகள் மற்றும் வீட்டு தேவைகளை வாங்க பொதுமக்கள், சென்னையின் தியாகராயநகர் உள்ளிட்ட வணிக வீதிகளில் நேற்று லட்சக்கணக்கான மக்கள் திரண்டனர். பாதுகாப்பை உறுதி செய்ய, சென்னையில் 18,000 போலீஸார் பணியில் ஈடுபட்டிருந்தனர்.

தீபாவளி பண்டிகை அடுத்த வாரம் செவ்வாய்க்கிழமை, 31ஆம் தேதி கொண்டாடப்பட உள்ளது. நேற்று கடைசி ஞாயிற்றுக்கிழமை என்பதால், மக்கள் புத்தாடை, நகை, பட்டாசுகள் வாங்க கடைகளில் பெருமளவில் திரண்டனர். தியாகராயநகர் ரங்கநாதன் தெரு, பாண்டிபஜார், பூக்கடை, வண்ணாரப்பேட்டை, புரசைவாக்கம் உள்ளிட்ட பகுதிகளில் கடைகளில் மக்கள் கூட்டம் அதிகமாக காணப்பட்டது.

இதை முன்னிட்டு, சென்னை காவல் ஆணையர் அருண் முன்னெச்சரிக்கையாக பாதுகாப்பு ஏற்பாடுகளை மேற்கொண்டார். கூட்ட நெரிசலை கட்டுப்படுத்தவும், குற்றங்களை தடுக்கவும், போக்குவரத்தை ஒழுங்குபடுத்தவும் முழுமையான திட்டமிடல் செய்யப்பட்டது. இந்த நடவடிக்கையின் ஒரு பகுதியாக, 18,000 போலீஸார் பாதுகாப்பு மற்றும் கண்காணிப்பு பணியில் ஈடுபடுத்தப்பட்டனர்.

விசேஷமாக, தியாகராயநகர் மற்றும் வண்ணாரப்பேட்டையில் 17 தற்காலிக கண்காணிப்பு கோபுரங்கள் அமைக்கப்பட்டு, அங்கிருந்து போலீஸார் கூட்ட நெரிசல் மற்றும் குற்றச்செயல்களை கண்காணித்தனர். ஒலி பெருக்கிகள் மூலம் பொதுமக்களுக்கு பாதுகாப்பு அறிவுரைகளும் வழங்கப்பட்டன. மேலும், பொதுமக்கள் தங்கள் நகைகளை பாதுகாக்க கழுத்தில் துணி கவசங்கள் இலவசமாக வழங்கப்பட்டது.

தியாகராயநகர் மற்றும் வண்ணாரப்பேட்டை பகுதிகளில் கூடுதலாக 42 கண்காணிப்பு கேமராக்கள் பொருத்தப்பட்டு, கண்காணிப்பு நடவடிக்கைகள் தீவிரமாக மேற்கொள்ளப்பட்டது. 5 தற்காலிக கட்டுப்பாட்டு அறைகள் மற்றும் 10 உதவி மையங்கள் அமைக்கப்பட்டு, காணாமல் போன குழந்தைகளை அவர்களது பெற்றோர்களிடம் ஒப்படைக்க நடவடிக்கைகள் மேற்கொள்ளப்பட்டன.

பொதுமக்களுக்கு உதவிசெய்ய, தியாகராயநகர் கட்டுப்பாட்டு அறைக்கான தொடர்பு எண் 73585 43058, புரசைவாக்கம் கட்டுப்பாட்டு அறைக்கான எண் 78248 67234, பூக்கடை கட்டுப்பாட்டு அறைக்கான எண் 81223 60906 என அறிவிக்கப்பட்டுள்ளது. நெரிசலான இடங்களில் ட்ரோன்கள் மூலமாக கூடுதல் கண்காணிப்பு செய்யப்பட்டது.