சென்னை மாநகர போக்குவரத்துக் கழகத்தில் மேலும் 66 தாழ்தளப் பேருந்துகள் பயன்பாட்டுக்கு வந்து உள்ளதாக மாநகர போக்குவரத்துக் கழகம் தெரிவித்துள்ளது.

சென்னையில் கடந்த 6 ஆண்டுகளுக்கு முன்வரை பயன்பாட்டில் இருந்துவந்த தாழ்தளப் பேருந்து சேவை, சாலை வசதி, மெட்ரோ பணி காரணமாக நிறுத்தப்பட்டது. 

இந்த நிலையில், மாற்றுத் திறனாளிகள் பயன்பெறும் வகையில் மீண்டும் தாழ்தளப் பேருந்துகள் இயக்க நீதிமன்றம் உத்தரவின்படி, மாநகர போக்குவரத்துக் கழகத்துக்கு நவீன தொழில் நுட்பத்துடன் கூடிய 611 தாழ்தளப் பேருந்துகள் ஒதுக்கீடு செய்யப்பட்டன.

முதல்கட்டமாக 58 பேருந்துகளை கடந்த மாதம் அமைச்சர் உதயநிதி தொடங்கி வைத்தார். இந்நிலையில், இரண்டாம் கட்டமாக 66 புதிய தாழ்தளப் பேருந்துகள் பயன்பாட்டுக்கு வந்துள்ளன. இந்த பேருந்துகள் 

அம்பத்தூர் தொழிற்பேட்டை - வேளச்சேரி, 
தாம்பரம் - செங்குன்றம், 
கோயம்பேடு - அண்ணா சதுக்கம் உள்ளிட்ட 11 வழித் தடங்களில் இயக்கப்படுவதாக மாநகர போக்குவரத்துக் கழகம் தெரிவித்துள்ளது.

பயணிகள் கவனத்திற்கு!

சென்னை, மாநகர் போக்குவரத்துக் கழகம் சார்பாக முதற்கட்டமாக 58 தாழ்த்தள பேருந்துகள் இயக்கப்பட்டு வருகிறது.

மேலும், இரண்டாம் கட்டமாக 66 புதிய தாழ்த்தள பேருந்துகள் பொதுமக்கள் பயன்பாட்டிற்கு வந்துள்ளது.

அவைகள் இயக்கப்படும் வழித்தடங்கள் குறித்த விவரம்👇.… pic.twitter.com/hgihGwuVMk

— MTC Chennai (@MtcChennai) September 27, 2024

இந்த பேருந்துகளில் உள்ள வசதிகள்: இறங்கு தளத்தின் உயரத்தை 60 மி.மீ குறைத்து (kneeling) பயணிகள் ஏறிய பிறகு, பழைய உயரத்துக்கு மாற்றிக் கொள்ளும் வசதி உள்ளது. மேலும், மாற்றுத்திறனாளிகள் சக்கர நாற்காலியுடன் ஏறி, இறங்குவதற்கு சாய்தள வசதி உள்ளது.