தமிழ்நாடு அரசின் பொதுத்துறை நிறுவனமான ஆவின் மூலம் தமிழக முழுவதும் சிவப்பு நிற பால்பாக்கெட் 500 மி.லி ரூ. 34க்கும், ஆரஞ்சு நிற பால் பாக்கெட் ரூ. 30க்கும், பச்சை நிற பால் பாக்கெட் ரூ. 22க்கும், நீல நிற பால் பாக்கெட் ரூ. 20க்கும் விற்பனை செய்யப்படுகிறது. கடந்த சில மாதங்களுக்கு முன்பு ஆவின் நிர்வாகம் அறிமுகப்படுத்திய ஊதா நிற பால் பாக்கெட் ரூ. 22க்கு விற்பனை செய்யப்படுகிறது.

திமுக தனது தேர்தல் வாக்குறுதி படி ஆவின் பால் லிட்டருக்கு ரூ. 3 குறைக்கப்பட்டதால் வருவாய் இழப்பு ஏற்பட்டு ஆவின் நிறுவனம் நஷ்டத்தில் இயங்கி வருவதாக தகவல் தெரிவிக்கின்றன. இது நிலையில் ஆவின் நிறுவன வருமானத்தை அதிகரிக்க பல்வேறு நடவடிக்கைகளை தமிழக அரசு மேற்கொண்டு வருகிறது. அந்த வகையில் ஆவின் நிறுவனம் புதிய வகை பால் பாக்கெட்டை குறைந்த விலையில் அறிமுகப்படுத்தப்பட உள்ளது.

அதன்படி மிக குறைந்த கொழுப்பு சத்துள்ள பாலை தயாரித்து சென்னை, திருவள்ளூர், காஞ்சிபுரம், செங்கல்பட்டு ஆகிய மாவட்டங்களில் விற்பனை செய்ய ஆவின் நிர்வாகம் முடிவெடுத்துள்ளது. கடந்த சில மாதங்களாக சென்னையில் பால் தட்டுப்பாடு நிலவி வருவதாக கூறப்படும் நிலையில் புதிய வகை மஞ்சள் நிற பால் பாக்கெட் 500 மி.லி 19 ரூபாய்க்கு விற்பனை செய்ய முடிவு செய்யப்பட்டுள்ளது.

இருமுறை சமன்படுத்தப்பட்ட பாலில் கொழுப்பு சத்து குறைவு என்பதால் அதனை குடிப்பதற்கு மருத்துவர்கள் பரிந்துரை செய்துள்ளதாக ஆவின் நிர்வாகம் தெரிவித்துள்ளது. சென்னை மக்களின் தேவைக்காக விரைவில் இந்த பால் பாக்கெட் விற்பனைக்கு வரும் என எதிர்பார்க்கப்படுகிறது.