கடந்த 13-ந்தேதி ஓணம் பண்டிகையை முன்னிட்டு பிரசித்தி பெற்ற சபரிமலை ஐயப்பன் கோவில் நடை  திறக்கப்பட்ட நிலையில், தொடர்ந்து 14-ந் தேதி முதல் வழக்கமான பூஜை மற்றும் படி பூஜை, உதயாஸ்தமன பூஜை உள்பட பல்வேறு சிறப்பு பூஜை வழிபாடுகள் நடந்து முடிந்தது.

பின்னர், திருவோணத்தை முன்னிட்டு கடந்த 15-ந் தேதி அன்று சிறப்பு பூஜை, வழிபாடுகளுடன் சபரிமலை ஐயப்பன் கோவிலில் ஐயப்ப பக்தர்களுக்கு ஓணம் விருந்து (சத்யா) அளிக்கப்பட்டது. இதன் தொடர்ச்சியாக ஓணம் விருந்து 16 மற்றும் 17-ந் தேதியும் ஐயப்ப பக்தர்களுக்கு 3 நாட்கள் அளிக்கப்பட்டது.

இந்நிலையில், சகஸ்ர கலச பூஜை மற்றும் வழிபாடுகள் தந்திரி தலைமையில் 8-ம் நாளான நாளை (சனிக்கிழமை) சபரிமலை கோவிலில் நடைபெற உள்ளது. இதனை தொடர்ந்து இரவு 10.30 மணிக்கு அரிவராசனம் பாடி நடை அடைக்கப்பட்டு பின்னர், ஐப்பசி மாத பூஜைக்காக சபரிமலை ஐயப்பன் கோவில் நடை மீண்டும் அடுத்த மாதம் அக் 16-ந் தேதி அன்று மாலை 5 மணிக்கு திறக்கப்படும். 

இதை தொடர்ந்து,  சபரிமலை ஐயப்பன் கோவிலில் 5 நாட்களாக அக்21-ந் தேதி வரை சிறப்பு பூஜை வழிபாடுகள் நடைபெற உள்ளது. அதன்படி, தினசரி 50 ஆயிரம் பக்தர்கள் இந்த நாட்களில் ஆன்லைன் முன்பதிவு அடிப்படையில் தரிசனத்திற்கு அனுமதிக்கப்படுவார்கள் என்று திருவிதாங்கூர் தேவஸ்தானம் தெரிவித்துள்ளது.