ஜம்மு காஷ்மீரின் பாரமுல்லா மாவட்டத்தில் உள்ள உரி பகுதியில் ஊடுருவல் முயற்சியின் போது ஒரு என்கவுன்டர் நடந்தது. உரியின் கோஹ்லான் பகுதியில் உள்ள எல்லைக் கட்டுப்பாட்டு கோடு அருகே பாதுகாப்புப் படையினருக்கும் பயங்கரவாதிகளுக்கும் இடையே நடந்த இந்த மோதலில் 2 பயங்கரவாதிகள் கொல்லப்பட்டனர்.

கடந்த ஜூன் 19 அன்று, ஜம்மு காஷ்மீர் மாநிலம் சோபூரில் பயங்கரவாதிகளுக்கும் பாதுகாப்புப் படையினருக்கும் இடையே என்கவுன்டர் நடந்தது. இந்த என்கவுன்ட்டரிலும் பாதுகாப்புப் படையினரால் 2 பயங்கரவாதிகள் சுட்டுக் கொல்லப்பட்டனர். சமீப காலமாக காஷ்மீரில் தொடர்ந்து தீவிரவாத தாக்குதல்கள் அதிகரித்து வருகின்றன.

பிரதமர் மோடியின் மூன்றாவது முறையாக பதவியேற்பு விழாவின் போது, ஜம்மு ​​காஷ்மீர் மாநிலம் ரியாசியில் பக்தர்கள் நிரம்பிய பேருந்து மீது பயங்கரவாதிகள் தாக்குதல் நடத்தினர். கடந்த ஜூன் 9ஆம் தேதி  அன்று நடந்த இந்த பயங்கரவாத தாக்குதலில் குறைந்தது 9 யாத்ரீகர்கள் உயிர் இழந்தனர் மற்றும் பல பேர் படு காயமடைந்தனர். ரியாசியில் பயங்கரவாதிகளின் தாக்குதலின் போது , பேருந்து ஓட்டுநரின் கட்டுப்பாட்டை இழந்து பேருந்து நேராக பள்ளத்தில் கவிழ்ந்தது.

காஷ்மீரில் தோடா மாவட்டத்தில் இந்த வாரம் இரண்டாவது தாக்குதல் நடத்தப்பட்டது. அந்த மாநிலத்தில் போலீஸ் மற்றும் பாதுகாப்புப் படையினரின் கூட்டுச் சாவடி மீது பயங்கரவாதிகள் தாக்குதல் நடத்தினர். அப்போது இரு தரப்பிலும் துப்பாக்கிச் சூடு நடந்தது. இந்த தாக்குதல் சம்பவத்தில் 5 ராணுவ வீரர்கள் மற்றும் ஒரு போலீஸ் அதிகாரி காயமடைந்தனர். 

ஜம்மு காஷ்மீர் கதுவா மாவட்டத்தின் சர்தால் பகுதியின் எல்லையில் உள்ள சட்டர்கல பகுதியில் உள்ள ராணுவ தளத்தில் உள்ள போலீஸ் மற்றும் தேசிய ரைபிள்ஸ் கூட்டுப்படை மீது இந்த தாக்குதல் நடத்தப்பட்டுள்ளது. பயங்கரவாதிகள் துப்பாக்கியால் சுட்டதோடு, கையெறி குண்டுகளையும் வீசினர். இந்த தாக்குதலுக்கு ஜெய்ஷ்-இ-முகமது அமைப்புடன் தொடர்புடைய காஷ்மீர் புலிகள் பொறுப்பேற்றனர்.

மேலும் இந்த பயங்கரவாதிகளுடனான என்கவுன்டரில் ஒரு சிஆர்பிஎஃப் ஜவான் உயிர் இழந்தார். இந்த என்கவுன்டரில் 2 தீவிரவாதிகளும் கொல்லப்பட்டனர். காஷ்மீரில் தேடுதல் நடவடிக்கையின் போது, ​​ஒரு உள்ளூர் நபர் சந்தேகத்திற்கிடமான நடவடிக்கைகள் குறித்து எச்சரிக்கை எழுப்பினார். இதனால் , பயங்கரவாதிகள் துப்பாக்கிச் சூடு நடத்தினர். இதை தொடர்ந்து, பயங்கரவாதிகளுக்கு எதிராக பாதுகாப்புப் படையினர் பதில் தாக்குதல் நடத்தினர்.