தமிழகத்தில் சமீப காலமாக போதைப்பொருள் பழக்கம் அதிகரித்துள்ளது. குறிப்பாக கஞ்சா உள்ளிட்ட போதை பொருட்கள் இளைஞர்களுக்கு எளிதில் கிடைக்கிறது. தற்போது அதிகரித்து வரும் போதைப் பழக்கத்தால் வருங்கால இளைஞர்களின் வாழ்க்கை கேள்விக்குறியாகி வருகிறது. 

அதன் காரணமாக தமிழகம் முழுவதும் போதைப்பொருள் பழக்கத்தை தடுக்க அரசு மதுபான கடைகளை படிப்படியாக மூடக்கோரி தமிழக அரசியல் தலைவர்கள் மற்றும் பொதுமக்கள் கோரிக்கை வைத்து வருகின்றனர். 

இந்த நிலையில் போதையற்ற தமிழகத்தை உருவாக்க ஒரு கோடி மக்களிடம் கையெழுத்து பெரும் பிரச்சார இயக்கத்தை இந்திய ஜனநாயக வாலிபர் சங்கம் தொடங்கியுள்ளது. இந்த பிரச்சார இயக்கத்தை விடுதலைப் போராட்ட வீரரும், மூத்த கம்யூனிஸ்ட் கட்சி தலைவருமான என்.சங்கரய்யா தொடங்கி வைத்தார்.

போதையற்ற தமிழகம் ஒரு கோடி கையெழுத்து என்ற இயக்கத்தில் நடிகர் கமல்ஹாசன், விஜய் சேதுபதி, நடிகை ஐஸ்வர்யா ராஜேஷ் மற்றும் அரசியல் தலைவர்கள், சின்னத்திரை நடிகர்கள் ஆகியோர் ஆதரவு தெரிவித்து கையெழுத்து விட்டு வருகின்றனர். 

இந்த நிலையில் போதையற்ற தமிழகம் ஒரு கோடி கையெழுத்து இயக்கத்தில் சூப்பர் ஸ்டார் ரஜினிகாந்த் அவர்கள் கையெழுத்திட்டு மிகச் சிறந்த பணிக்கு வாழ்த்துக்கள் தெரிவித்து வழியனுப்பி உள்ளார்.