புஷ்பா 2 படப்பிடிப்பு தளத்திலிருந்து புகைப்படம் வெளியிட்ட ராஷ்மிகா -  எதிர்பார்ப்பில் ரசிகர்கள்.!

சுகுமார் இயக்கத்தில் நடிகர் அல்லு அர்ஜூன், ராஷ்மிகா, பஹத் பாசில் உள்ளிட்டப் பலர் நடித்திருந்த திரைப்படம் ’புஷ்பா’. பான் இந்தியா அளவில் வசூலிலும் மாபெரும் வெற்றிப் பெற்ற இந்தப் படத்தில் நடித்ததற்காக சிறந்த நடிகருக்கான தேசிய விருதை நடிகர் அல்லு அர்ஜூனும், சிறந்த இசையமைப்பாளருக்கான விருதை தேவி ஸ்ரீ பிரசாத்தும் பெற்றனர்.

இந்த மகிழ்ச்சியைக் கொண்டாடும் விதமாக நடிகர் அல்லு அர்ஜுன் தன் வீட்டில் இருந்து ’புஷ்பா2’ படப்பிடிப்புத் தளத்திற்குச் செல்லும் வரையில், தொடர் வீடியோ ஒன்றை பதிவு செய்து, தனது இன்ஸ்டாகிராம் பக்கத்தில் பகிர்ந்து ரசிகர்களுக்கு நன்றி தெரிவித்தார்.

இந்த நிலையில், நடிகை ராஷ்மிகா தனது இன்ஸ்டாகிராம் பக்கத்தில் ‘புஷ்பா2’ படப்பிடிப்புத் தளத்தில் இருந்து புதிய புகைப்படம் ஒன்றைப் பகிர்ந்துள்ளார். பிரம்மாண்ட வீடு போன்று இருக்கும் இந்தப் படம் இந்த இரண்டாம் பாகம் இன்னும் பிரம்மாண்டமாக உருவாகிக் கொண்டிருக்கிறது என்பதைத் தெரிவிக்கிறது என்று ரசிகர்கள் பகிர்ந்து வருகின்றனர். 

தேசிய விருது கிடைத்தப் பிறகு இந்தப் படத்திற்கான வியாபாரம் உலகளவில் ஆயிரம் கோடி என்ற அளவிற்கு விரிவடைந்துள்ளதாகவும் தகவல் வெளியாகியுள்ளது.