ஹரி இயக்கத்தில் விஷால் நடிப்பில் உருவாகும் புதிய படத்தின் படப்பிடிப்பு நடந்து வருகிறது. தூத்துக்குடி பகுதியில் படப்பிடிப்பு நடைபெற்ற போது விஷால் அங்குள்ள ஒரு கிராமத்திற்கு குடிநீர் தொட்டி கட்டி கொடுத்தார். 

படத்தின் அடுத்தகட்ட படப்பிடிப்பு காரைக்குடி பகுதியில் தொடங்க உள்ளதால் சென்னையில் இருந்து படப்பிடிப்பு குழுவினர் பல்வேறு குழுக்களாக காரைக்குடி புறப்பட்டு சென்றனர். 

இதில் படப்பிடிப்பிற்கு தேவையான மின் விளக்குகள், ஜெனரேட்டர் போன்ற படப்பிடிப்பு உபகரணங்களை ஏற்றுக் கொண்டு சென்ற வேனை திருவண்ணாமலை மாவட்டத்தைச் சேர்ந்த நாதன் (வயது 23) என்பவர் ஒட்டி சென்றுள்ளார். 

இந்த வேனில் படப்பிடிப்பு குழுவைச் சேர்ந்த 4 பேர் சென்றுள்ளனர். இந்நிலையில் திருச்சி-காரைக்குடி தேசிய நெடுஞ்சாலையில் வேன் சென்று கொண்டிருந்த போது திடீரென ஓட்டுனரின் கட்டுப்பாட்டை இழந்து கவிழ்ந்து விபத்துக்குள்ளானது. 

இந்த விபத்தில் வேனில் பயணித்த 4 பேரும் படுகாயம் காயமடைந்தனர். இது குறித்து தகவல் அறிந்த போலீசார் சம்பவ இடத்திற்கு விரைந்து சென்று படுகாயமடைந்த 4 பேரையும் மீட்டு புதுக்கோட்டை மருத்துவமனைக்கு சிகிச்சைக்காக அனுப்பி வைத்தனர். 

அங்கு அவர்களுக்கு சிகிச்சை அளிக்கப்பட்டு வருகிறது. நெடுஞ்சாலையில் வேன் கவிழ்ந்து விபத்து ஏற்பட்டதால் அப்பகுதியில் சிறிது நேரம் போக்குவரத்து பாதிப்பு ஏற்பட்டது. போலீசார் அதனை சரி செய்து போக்குவரத்தை சீரமைத்தனர். 

இதனைத் தொடர்ந்து கிரீன் உதவியுடன் விபத்து ஏற்பட்ட வேன்  அப்புறம் படுத்தப்பட்டது. இந்த விபத்து தொடர்பாக திருக்கோகர்ணம் போலீசார் வழக்கு பதிவு செய்து விசாரணை நடத்தினர். 

விசாரணையில் வேன் ஓட்டுநர் தூங்கியதன் காரணமாக இந்த விபத்து ஏற்பட்டிருக்கலாம் என தெரியவந்துள்ளது.