இயக்குனர் ராஜ்குமார் பெரியசாமி இயக்கத்தில், சிவகார்த்திகேயன் நடிப்பில் வெளியான படம் 'அமரன்'. ராஜ்கமல் பிலிம்ஸ் தயாரித்துள்ள இந்தப் படத்திற்கு ஜி.வி.பிரகாஷ் குமார் இசையமைத்துள்ளார். மறைந்த முன்னாள் ராணுவ வீரர் மேஜர் முகுந்தின் வாழ்க்கையைத் தழுவி உருவாகியுள்ள இந்தப் படத்தில் சிவகார்த்திகேயன் மேஜர் முகுந்தாகவும், முகுந்தின் மனைவி இந்துவாக நடிகை சாய் பல்லவியும் நடித்திருந்தார். 

இந்தப்படம் ரசிகர்கள் மத்தியில் நல்ல வரவேற்பை பெற்று சுமார் ரூ.300 கோடியை வசூல் செய்துள்ளது. இந்த நிலையில், அமரன் படம் மூலம் தனக்கு 'மன வேதனை' ஏற்பட்டுள்ளதாக என்ஜினீயரிங் மாணவர் ஒருவர் படக்குழுவுக்கு வக்கீல் நோட்டீஸ் அனுப்பியுள்ளார். அதில், படத்தில் வரும் ஒரு காட்சியில் சாய் பல்லவியின் செல்போன் எண் காட்டப்பட்டிருக்கும். 

ஆனால் அந்த செல்போன் எண் தன்னுடையது என்றும் அந்த எண் நடிகை சாய் பல்லவியின் உண்மையான செல்போன் எண் என நினைத்து பலரும் அந்த எண்ணுக்கு போன் செய்து வாழ்த்து கூற முயன்றுள்ளதனால் மன வேதனை அடைந்துள்ளதாகவும், படம் வெளியான நாளில் இருந்து தொடர்ந்து வரும் அழைப்புகளால் என்னால் தூங்கவோ, படிக்கவோ, மற்ற வேலைகளை செய்யவோ முடிவதே இல்லை என்றும் தெரிவித்துள்ளார். மேலும், தனக்கு ரூ.1 கோடியே 10 லட்சம், நஷ்ட ஈடு வழங்க வேண்டும் என்றும் கூறி நோட்டீஸ் அனுப்பியுள்ளார்.