மும்பை: புகழ்பெற்ற வரலாற்று அறிஞரும் எழுத்தாளருமான யுவால் நோவா ஹராரி, செயற்கை நுண்ணறிவு (ஏஐ) தொடர்பாக மிக முக்கியமான கருத்துகளை முன்வைத்து எச்சரித்துள்ளார்.

மும்பையில் உள்ள நட்சத்திர விடுதியில் நடந்த நிகழ்ச்சியில் அவர் பேசுகையில், ஏஐ தொழில்நுட்பத்தின் அபாயங்கள் மற்றும் அதன் எதிர்கால தாக்கங்கள் குறித்து தனது பார்வையை பகிர்ந்தார்.

“ஏஐ ஒரு கருவி அல்ல, அது ஒரு ஏஜென்ட். அதுவே தனது செயல்பாடுகளை உருவாக்கி, நிர்வகிக்கும் திறன் பெற்றுள்ளது. புத்தகம் அல்லது அச்சகம் நம் கட்டுப்பாட்டில் இருந்து தப்பாது. ஆனால் ஏஐ, தனது உருவாக்கத்தால் நம்மை அதன் கட்டுப்பாட்டுக்கு கொண்டு செல்லும் ஆபத்து உள்ளது. அதனால், அதனை முழுமையாக கட்டுப்படுத்துவது கடினமாக இருக்கிறது,” என அவர் கூறினார்.

2016-ஆம் ஆண்டு ஆல்பா கோ எனும் ஏஐ, கோ விளையாட்டின் உலக சாம்பியனான லீ செடோலை தோற்கடித்தது. அது முற்றிலும் புதுமையான யுக்திகளை உருவாக்கியது, இதனால் மனிதர்கள் இதுவரை பயன்படுத்திய எல்லா நுணுக்கங்களை மாற்றியமைத்தது. இது ஏஐ யின் சுயமான கற்றல் மற்றும் புதிய மாற்றங்களைக் கண்டுபிடிக்கும் திறனை வெளிப்படுத்துகிறது.

“ஏஐ, டெக்ஸ்ட், இமேஜ், வீடியோ ஆகியவற்றை மிக விரைவாகவும் புதியதாகவும் உருவாக்கி வருகிறது. இதன் மூலம், மனிதர்களின் தகவல் பரிமாற்ற முறைகளையும் சமூக அமைப்புகளையும் மாற்றும் ஆற்றல் கொண்டதாக இருக்கிறது. எனவே, இதனை சமுதாய நன்மைக்காக பயன்படுத்துவதற்கு முறையான சட்டங்களும், கட்டுப்பாடுகளும் அவசியம்” என ஹராரி கருத்து தெரிவித்தார்.

இந்நிகழ்ச்சியில் ஹராரி, தனது புத்தகமான ‘நெக்சஸ்: கற்காலம் முதல் செயற்கை நுண்ணறிவு வரையிலான தகவல் பரிமாற்ற அமைப்பு முறைகளின் வரலாறு’ குறித்தும் பேசினார்.

“நாட்டில் பல சட்டங்கள் தீவிரவாத ஒழிப்பு என்ற பெயரில் அறிமுகப்படுத்தப்படுகின்றன. ஆனால் அவை சில சமுதாயங்களை மட்டும் பாதிக்க பயன்படுத்தப்படுகின்றன. அதுபோல், ஏஐ தொழில்நுட்பத்தை சமதர்மமாக கையாள வேண்டும். இல்லையெனில், அது எதிர்காலத்தில் நம்மையே ஆட்சி செய்யும் நிலைக்கு மாறும்,” என அவர் எச்சரித்தார்.

ஏஐ யின் முன்னேற்றம், மனித வாழ்க்கையை மேம்படுத்தும் திறன் கொண்டது. அதேசமயம், அதைச் சரியாக அணுகினால் மட்டுமே, அதன் தீமைகளை தவிர்க்க முடியும். ஏஐ மனிதனின் அடிமையாகவே இருக்க வேண்டும், மாறாக மனிதன் அதன் அடிமையாவதை தவிர்க்க வேண்டும் என யுவால் ஹராரி தமது கருத்தை வலியுறுத்தினார்.