ஒரு கோடி மதிப்புள்ள ராமர் சிலை மீட்பு.!
Ramar Idol smuggling
ஜெர்மனிக்கு கடத்தப்படவிருந்த ஒரு கோடி ரூபாய் மதிப்பிலான ராமர் சிலையை காவல்துறையினர் மீட்டுள்ளனர்.
சென்னை ஆலந்தூரில் உள்ள தனியார் ஏற்றுமதி மற்றும் இறக்குமதி நிறுவனத்தில் தொன்மையான ராமர் சிலை பதுக்கி வைக்கப்பட்டு இருப்பதாகவும், அது வெளி நாட்டிற்கு கடத்தப்பட இருப்பதாகவும் சிலை கடத்தல் தடுப்பு பிரிவு காவல்துறையினருக்கு தகவல் கிடைத்தது.
இந்த தகவலை அடுத்து சிலை கடத்தல் ஐ.ஜி. தினகரன் தலைமையிலான காவலர்கள், ஆலந்தூரில் உள்ள அந்த நிறுவனத்தில் நேற்று திடீர் சோதனையில் ஈடுபட்டனர். அப்போது மிகவும் நேர்த்தியாக பார்சல் செய்யப்பட்ட நிலையில் ஒரு கோடி ரூபாய் மதிப்புள்ள ராமர் கற்சிலை, பார்சலில் இருந்தது கண்டுபிடிக்கப்பட்டது.
விசாரணையில் இந்த சிலை சென்னையில் இருந்து விமானம் மூலம் ஜெர்மனிக்கு கடத்த இருப்பதும் தெரியவந்தது. இதையடுத்து போலீசார் சிலையை மீட்டு தொடர்ந்து விசாரணை நடத்தி வருகின்றனர்.