கன்னியாகுமரி மாவட்டம் நாகர்கோவிலை அடுத்த பார்வதிபுரம் பகுதியை சேர்ந்தவர் நாஞ்சில் ஜெயக்குமார் பல கட்சிகளுக்கு தாவி தற்போது பாஜகவில் முக்கிய நிர்வாகியாக செயல்பட்டு வருகிறார். அவர் நாகர்கோவில் கோட்டார் அருகே உள்ள மருத்துவமனைக்கு சிகிச்சைக்காக சென்ற போது அங்கு பணியில் இருந்த பெண் மருத்துவருக்குபாலியல் தொல்லை அளித்ததாக கூறப்படுகிறது.

மேலும்,  பெண் மருத்துவருக்கு செல்போனில் தொடர்பு கொண்டு பாலியல் ரீதியாக தொல்லை கொடுத்ததாகவும் கூறப்படுகிறது. இதனால் அந்த பெண் மருத்துவர் ஜெயக்குமார் மீது கோட்டார் காவல் நிலையத்தில் புகார் அளித்துள்ளார். ஜெயக்குமார் மீது 4 பிரிவுகளின் கீழ் வழக்கு பதிவு செய்தகோட்டார் போலீசார் விசாரணை மேற்கொண்டனர்.

அதில் கடந்த 2022ம் ஆண்டு ஓய்வு பெற்ற உதவி ஆய்வாளரிடம் பண மோசடியில் ஈடுபட்டது உட்பட பல வழக்குகள் நாஞ்சில் ஜெயக்குமார் மீது நிலுவையில் இருப்பது தெரியவந்தது. இதனை அடுத்து நாஞ்சில் ஜெயக்குமார் குண்டர் சட்டத்தில் கைது செய்யப்பட்டு சிறையில் அடைக்கப்பட்டிருந்தார் என்பது தெரிய வந்துள்ளது. பிறகு சிறையில் இருந்து வெளிவந்து பாஜகவில் இணைந்துள்ளார்.

இந்த நிலையில் தான் பெண் மருத்துவருக்கு பாலியல் தொல்லை அளிக்கப்பட்டதாக ஜெயக்குமார் மீண்டும் கைதாகியுள்ளார். நாஞ்சில் ஜெயக்குமார் பாஜக மாநில தலைவர் அண்ணாமலை மற்றும் முன்னாள் மத்திய இணை அமைச்சர் பொன்.ராதாகிருஷ்ணனுடன் எடுத்துக் கொண்ட புகைப்படம் தற்போது சமூகவலைதளங்களில் வைரலாகி வருகிறது.