இந்திய சினிமாவில் பிரபல நடிகராக இருப்பவர் சூப்பர் ஸ்டார் ரஜினிகாந்த். கடைசியாக இவருடைய நடிப்பில் வெளியான அண்ணாத்த திரைப்படம் எதிர்பார்த்த அளவுக்கு ரசிகர்களிடையே வரவேற்பை பெறவில்லை. இதனையடுத்து தற்போது இயக்குனர் நெல்சன் திலிப் குமார் இயக்கத்தில் ஜெயிலர் என்ற திரைப்படத்தில் நடித்து வருகிறார். 

இந்த படத்தை சன் பிக்சர்ஸ் தயாரிப்பு நிறுவனம் தயாரிக்கிறது. மேலும், இந்த படத்தில் மலையாள சூப்பர் ஸ்டார் மோகன்லால், கன்னட நடிகர் சிவராஜ்குமார், யோகி பாபு, ரம்யா கிருஷ்ணன், தமன்னா ஆகியோர் முக்கிய கதாபாத்திரங்களில் நடிக்கின்றனர். இந்த படத்திற்கு ராக் ஸ்டார் அனிருத் இசையமைக்கிறார்.

இந்தப் படத்தின் படப்பிடிப்பு சமீபத்தில் முடிவடைந்த நிலையில் போஸ்ட் ப்ரொடக்‌ஷன் பணிகள் விறுவிறுப்பாக நடைபெற்று வருகிறது. மேலும், வரும் ஆகஸ்ட் மாதம் வெளியாகும் என படக்குழு அறிவித்துள்ளது.

அதனைத் தொடர்ந்து சூப்பர் ஸ்டார் ரஜினிகாந்த் அடுத்ததாக நடிக்க உள்ள 170 திரைப்படத்தை ஜெய் பீம் திரைப்படத்தை இயக்கிய  த.செ.ஞானவேல் இயக்குகிறார். இந்த திரைப்படத்திற்கு அனிருத் இசையமைக்க, லைகா ப்ரொடக்ஷன்ஸ் தயாரிப்பு நிறுவனம் தயாரிக்கிறது. மேலும் இந்த திரைப்படம் அடுத்தாண்டு வெளியாகும் என அறிவிக்கப்பட்டுள்ளது.

இந்த நிலையில் சூப்பர் ஸ்டார் ரஜினிகாந்த் நடிக்கும் 170 வது திரைப்படத்தில் பாலிவுட் சூப்பர் ஸ்டார் நடிகர் அமிதாப்பச்சன் முக்கிய கதாபாத்திரத்தில் நடிக்க உள்ளதாக சமூக வலைத்தளங்களில் தகவல் வெளியாகி உள்ளது. 

இதற்கு முன் ரஜினிகாந்த் மற்றும் அமிதாப் பச்சன் இருவரும் இணைந்து இந்தியில் வெளியான 'ஹம்' திரைப்படத்தில் நடித்துள்ளனர் என்பது குறிப்பிடத்தக்கது. என்ன தகவல் தற்போது ரஜினி ரசிகர்களுடைய உற்சாகத்தை ஏற்படுத்தி உள்ளது.