இந்தியாவில் உள்ள அனைத்து பல்கலைக் கழகங்கள் மற்றும் கல்லூரிகளில் உதவிப் பேராசியர்களாக பணிபுரிவதற்கான UGC - NET தேர்வு தேசிய தேர்வு முகமையால் ஆண்டு தோறும் நடத்தப் படும். இந்த தேர்வு ஒவ்வொரு ஆண்டும் ஜூன் மற்றும் டிசம்பர் மாதங்களில் இரு முறை கணினி வழியில் நடத்தப் படும்.

அந்த வகையில் இந்த ஆண்டு ஜூன் மாதத்திற்கான UGC - NET தேர்வு சில தினங்களுக்கு முன்பு நடைபெற்றது. இந்த தேர்வு நாடு முழுவதும் 317 நகரங்களில் சுமார் 1205 தேர்வு மையங்களில் நடைபெற்றது. மேலும் இந்த தேர்வை நாடு முழுவதும் 9 லட்சத்து 8 ஆயிரத்து 580 பேர் எழுதினர்.

ஆனால் தேர்வின் வெளிப்படைத் தன்மையை உறுதி செய்வதற்காக தேர்வு நடந்த மறுநாளே NTA இந்த UGC - NET தேர்வை ரத்து செய்து அதிர்ச்சி அளித்தது. இதற்கான மறுதேர்வு தேதி பின்னர் அறிவிக்கப்படும் என்று NTA அறிவித்தது. 

இந்நிலையில் தற்போது இந்த UGC - NET மறு தேர்வுக்கான தேதி வெளியிடப் பட்டுள்ளது. அதன்படி ரத்து செய்யப் பட்ட UGC - NET மறு தேர்வுகள் ஆகஸ்ட் 21 மற்றும் செப்டம்பர் 4 ஆகிய இரு தேதிகளில் நடைபெறும் என்று NTA அறிவித்துள்ளது. 

முன்னதாக ரத்து செய்யப் பட்ட தேர்வு எழுத்து தேர்வாக நடைபெற்றது குறிப்பிடத்தக்கது. ஆனால் தற்போது அறிவிக்கப் பட்டுள்ள மறு தேர்வுகள் கணினி வழியில் நடைபெறும் என்று அறிவிக்கப் பட்டுள்ளது.