குஜராத்தின் சூரத்தில் நடந்த ஒரு அதிர்ச்சி சம்பவத்தில், 90 வயது முதியவர் ஒருவர் போலி சிபிஐ அதிகாரிகளால் மிரட்டப்பட்டு ₹1.15 கோடி மோசடி செய்யப்பட்டார்.

இந்த முதியவர் பங்குச் சந்தை வர்த்தகத்தில் ஈடுபட்டவர். அவருக்கு சமீபத்தில் ஒரு வாட்ஸ்அப் அழைப்பு வந்தது. அந்த அழைப்பில் ஒருவர் தன்னை சிபிஐ அதிகாரி என அறிமுகப்படுத்திக் கொண்டு, "உங்கள் பெயரில் 400 கிராம் போதைப் பொருள் சீனாவுக்கு அனுப்பப்பட்டுள்ளது" எனக் கூறி மிரட்டினார். மேலும், அவரது வங்கி கணக்கில் பண மோசடிகள் நடைபெற்றதாகக் கூறி, தங்களை மற்றும் குடும்பத்தினரை கைது செய்யப் போவதாக கூறியுள்ளார்.

இதனால் பயமடைந்த முதியவர், அவசரமாக தனது வங்கி கணக்கிலிருந்து ₹1.15 கோடி பணத்தை போலி சிபிஐ அதிகாரி குறிப்பிட்ட வங்கி கணக்குக்கு மாற்றி விட்டார்.

இந்த சம்பவம் குறித்து முதியவரின் குடும்பத்தினர் சூரத் சைபர் குற்றப்பிரிவில் புகார் அளித்தனர். போலீஸார் விரைவாக நடவடிக்கை எடுத்து, 5 பேர் கொண்ட மோசடி கும்பலை கைது செய்துள்ளனர். விசாரணையில், இந்த கும்பல் சீனா மற்றும் கம்போடியாவில் உள்ள மற்றொரு குழுவுடன் இணைந்து செயல்பட்டது என்பதும் தெரிய வந்தது.

போலீசார் கைப்பற்றிய பொருட்கள்:

• 46 வங்கி டெபிட் கார்டுகள்
• 23 காசோலை புத்தகங்கள்
• 4 நிறுவன ரப்பர் ஸ்டாம்புகள்
• 28 சிம் கார்டுகள்
• 9 செல்போன்கள்

இதில் முக்கிய குற்றவாளி பரத் கோபானி கம்போடியாவில் இருப்பதாக சந்தேகிக்கப்படுகின்றது. அவரை பிடிக்க தனித்த விசாரணை குழு அமைக்கப்பட்டுள்ளது.

நிபுணர்கள் எச்சரிக்கை:

சைபர் சட்ட நிபுணர்கள் இந்த மோசடியை குறித்து கருத்து தெரிவிக்கையில், "இந்திய சட்டத்தில் டிஜிட்டல் கைது எனும் வழிமுறை கிடையாது. இது போலி தகவலை பரப்பி மக்களை பயமுறுத்தும் மோசடிக் கும்பலின் யுக்தி மட்டுமே. மக்கள் இதுபோன்ற சதி முறைகளை நம்பாமல் இருக்க வேண்டும்" என கூறியுள்ளனர்.

பிரதமரின் வேண்டுகோள்:

சமீபத்தில் மனதின் குரல் நிகழ்ச்சியில், பிரதமர் மோடி, "டிஜிட்டல் கைது போன்ற மோசடிகளுக்கு மக்கள் விழிப்புடன் இருக்க வேண்டும்" என நினைவூட்டினார்.

இந்த சம்பவம் மக்கள் சைபர் குற்றங்களால் தங்கள் தனிப்பட்ட தகவல்களை பாதுகாக்கவும், முறையாக அதிகாரிகள் அடையாளத்தை சரிபார்க்கவும் மிகவும் அவசியம் என்பதை உணர்த்துகிறது.