ராமநாதபுரம் மாவட்டத்தில் உள்ள, ராமேஸ்வரம் பகுதியில் இருந்து கடலுக்கு மீன்பிடிக்கச் செல்லும் மீனவர்களை, இலங்கை கடற்பகுதியில் அத்துமீறி நுழைந்ததாக கூறி கடற்படையினர் கைது செய்து வருகின்றனர். அவ்வாறு கைது செய்யப்படுபவர்களின் படகுகள் பறிமுதல் செய்யப்படுவதுடன், இரண்டாவது முறையாக கைது செய்யப்படும் மீனவர்களுக்கு சிறைத் தண்டனையும் விதிக்கப்படுகிறது.

இதனைக் கண்டித்து ராமேஸ்வரம் பகுதி மீனவர்கள் காலவரையற்ற வேலைநிறுத்தம், உண்ணாவிரதப் போராட்டங்களை மேற்கொண்டனர். ராமநாதபுரம் மாவட்ட ஆட்சியர் விஷ்ணு சந்திரன், திமுக சட்டமன்ற உறுப்பினர் காதர் பாட்ஷா முத்துராமலிங்கம்  நடத்திய சமரச பேச்சுவார்த்தையை ஏற்றுக் கொண்ட ராமேஸ்வரம் மீனவர்கள் போராட்டத்தை தற்காலிகமாக கைவிட்டனர்.

இந்த நிலையில் தமிழக மீனவர்களைக் கண்டித்து இலங்கை மீனவர்கள் தங்களது படகுகளில் கருப்பு கொடியுடன் நடுக்கடலில் இன்று போராட்டம் நடத்தி வருகின்றனர். இந்த போராட்டத்தில் யாழ்பாணம் மற்றும் குருநகரைச் சேர்ந்த சுமார் 70-க்கும் மேற்பட்ட மீனவர்கள் 21 படகுகளில் ஈடுபட்டுள்ளனர்.

நெடுந்தீவுக்கும், நயினாதீவுக்கும் இடைப்பட்ட பகுதியில் தான் தமிழக மீனவர்கள் அதிகம் எல்லை மீறுவதாக இலங்கை மீனவர்கள் குற்றம் சாட்டி போராட்டத்தில் ஈடுபட்டுள்ளனர். இந்த திடீர் போராட்டம் பெரும் பரபரப்பை ஏற்படுத்தியுள்ளது.