புதுச்சேரியில் மஞ்சள் ரேஷன் அட்டைதாரர்களுக்கு மாதம் ரூ.1000 வழங்கப்படும் என்று சட்டப்பேரவையில் முதல்வர் ரங்கசாமி அறிவித்துள்ளார்.

புதுச்சேரி சட்டப்பேரவையில் பட்ஜெட் மீதான விவாதத்தின் போது, எம்.எல்.ஏ.க்கள் பலரும் திட்டங்களின் செயல்பாடு, வருவாய் குறித்த கேள்விகளை எழுப்பினர். இதற்குப் பதிலளித்த முதல்வர், 2025-26 ஆம் நிதியாண்டுக்காக ரூ.13,600 கோடி ஒதுக்கப்பட்டுள்ளதாகவும், மக்களுக்கு பாதிப்பில்லாமல் வரிகள் விதிக்க திட்டமிடப்பட்டுள்ளதாகவும் தெரிவித்தார்.

அவரது உரையில், முக்கிய அறிவிப்புகள்:

* எம்.எல்.ஏக்களின் தொகுதி மேம்பாட்டு நிதி ரூ.3 கோடியாக உயர்வு.
* உயர் கல்வி உதவித்தொகை காலதாமதம் ஆனாலும், உரிய நேரத்தில் வழங்கப்படும்.
* சேதராப்பட்டில் சிறப்பு பொருளாதார மண்டலம் அமைப்பதற்கான நிலம் மீண்டும் மத்திய அரசிடம் இருந்து பெறப்பட்டு, தொழில் நிறுவனங்களை கொண்டு வர நடவடிக்கை மேற்கொள்ளப்படும்.
* ஐடி பூங்கா அமைப்பதற்கான முயற்சிகள் தீவிரமாக நடைபெற்று வருகிறது.
* பிஆர்டிசியில் கூடுதல் பேருந்துகள் இயக்கப்படும், வருவாய் அதிகரிக்க வாய்ப்பு.
* ரொட்டிபால் ஊழியர்களின் ஊதியம் ரூ.10,000 இலிருந்து ரூ.18,000 ஆக உயர்த்தப்படும்.
* அரசு பல நலத்திட்டங்களை செயல்படுத்தி வரும் நிலையில், முதியோர் உதவித் தொகை உயர்வு, குடும்பத் தலைவிகளுக்கு மாதம் ரூ.2500 வழங்கும் திட்டம் தொடரும். சிவப்பு ரேஷன் அட்டைதாரர்களுக்கு 20 கிலோ * * * இலவச அரிசி, மஞ்சள் அட்டைக்கு 10 கிலோ அரிசி வழங்கப்பட்டு வருகிறது.

மேலும், மஞ்சள் அட்டைதாரர்களுக்கு மாதம் ரூ.1000 உதவித் தொகை வழங்கப்படும் என முதல்வர் உறுதியாக அறிவித்துள்ளார்.