ஐசிசி டி20 உலக கோப்பை தொடரிலிருந்து ஓமன் அணி முதல் அணியாக வெளியேறி உள்ளது. நேற்று முன்தினம் குரூப் பி பிரிவில் லீக் ஆட்டத்தில் ஸ்காட்லாந்து - ஓமன் அணிகள் மோதின.

இந்த ஆட்டத்தில் முதலில் பேட்டிங் செய்த ஓமன் அணி நிர்ணயிக்கப்பட்ட 20 ஓவர்களில், 7 விக்கெட் இழப்பிற்கு, 150 ரன்கள் குவித்தது. அதிகபட்சமாக ஓமன் அணியின் அதிரடி ஆட்டக்காரர் பிரதிக் அதவாலே 2 சிக்ஸர்கள், 5 பவுண்டரிகளுடன் 54 ரன்கள் எடுத்தார்.

இதனை அடுத்து 151 ரன்கள் எடுத்தால் வெற்றி என்ற இலக்குடன் களமிறங்கிய ஸ்காட்லாந்த அணி ஆரம்பம் முதலே அதிரடியாக விளையாடியது.

குறிப்பாக ஜார்ஜ் முன்சே 20 பந்துகளில், 4 சிக்ஸர்கள், 2 பவுண்டரிகளுடன் 41 ரன்களும், பிரண்டன் மெக்முல்லன் 31 பந்துகளில், 2 சிக்ஸர்கள், 9 பவுண்டரிகளுடன் 61 ரன்களும் எடுத்தனர்.

இறுதியில் 13.1 ஓவர்களில் மூன்று விக்கெட்டுகளை மட்டும் இழந்து, 153 ரன்கள் குவித்து அபார வெற்றியை ஸ்கட்லாந்து அணி பதிவு செய்தது. 

இந்த வெற்றியின் மூலம் ஸ்காட்லாந்து அணி நிகர ரன்ரேட் 2.164 உடன் 5 புள்ளிகள் பெற்று முதலிடத்தில் உள்ளது. மேலும், சூப்பர் 8 சுற்றுக்கு முன்னேறுவதற்கான வாய்ப்பு பிரகாசமாகியுள்ளது. 

அதே சமயத்தில் இதேபிரிவில் உள்ள இங்கிலாந்து அணி தனது எஞ்சிய 2 ஆட்டங்களிலும் அதிக அளவிலான ரன் ரேட் வித்தியாசத்தில் வெற்றி பெற வேண்டும் என்ற நெருக்கடியான நிலைக்கு தள்ளப்பட்டுள்ளது. 

மேலும், ஹாட்ரிக் தோல்வியைச் சந்தித்துள்ள ஓமன் அணி சூப்பர் 8 சுற்றுக்கான வாய்ப்பை இழந்து தொடரில் இருந்து முதல் அணியாக வெளியேறியுள்ளது.