டி20 உலக கோப்பையில் ஆப்கானிஸ்தான் அணிக்கு எதிரான போட்டிகள் 4 ரன்கள் வித்தியாசத்தில் ஆஸ்திரேலியா த்ரில் வெற்றி பெற்றுள்ளது.

ஐசிசி 8வது டி20 உலகக்கோப்பை ஆஸ்திரேலியாவில் நடைபெற்று வருகிறது. இதில், முதல் சுற்று போட்டிகள் முடிவடைந்த நிலையில், தற்போது சூப்பர் 12 சுற்று போட்டிகள் நடைபெற்று வருகிறது.

டி20 உலக கோப்பை தற்போது இறுதிக்கட்டத்தை எட்டியுள்ள நிலையில், அரையிறுதி போட்டிக்கு தகுதி பெற அனைத்து அணிகளுக்கும் இடையே போட்டி நிலவி வருகிறது.

குரூப்-1 பிரிவில் இடம் பெற்றுள்ள நியூஸிலாந்து அணி 7 புள்ளிகளுடன் நெட் ரன் ரேட் அடிப்படையில் அரையிறுதிக்கு முன்னேறி உள்ளது. இங்கிலாந்து, ஆஸ்திரேலியா அணிகள் தல 5 புள்ளிகளுடன் இரண்டாவது மற்றும் மூன்றாவது இடத்தில் உள்ளது.

இந்த நிலையில் ஆஸ்திரேலியா ஆப்கானிஸ்தான் அணிகள் இன்று மதியம் 1:30 மணிக்கு அடிலெய்ட் மைதானத்தில் மோதின. டாஸ் வென்ற ஆப்கானிஸ்தான் அணி பவுலிங் தேர்வு செய்தது.

அதன்படி முதலில் பேட்டிங் செய்த ஆஸ்திரேலியா அணி 20 ஓவர்கள் முடிவில் 8 விக்கெட் இழப்பிற்கு 168 ரன்கள் எடுத்தது. ஆஸ்திரேலிய அணியில் சிறப்பாக விளையாடிய மிச்சல் மார்ஸ் 45 ரன்களும், மேக்ஸ்வெல் 52 ரன்களும் எடுத்தனர்.

அதனைத் தொடர்ந்து 169 ரன்கள் எடுத்தால் வெற்றி என்ற இலக்குடன் களமிறங்கிய ஆப்கானிஸ்தான் அணி கடைசி ஓவர் வரை போராடி இறுதியாக 20 ஓவர்கள் முடிவில் 7 விக்கெட் இழப்பிற்கு 164 ரன்கள் மட்டுமே எடுத்தது. இதன் மூலம் நான்கு ரன்கள் வித்தியாசத்தில் ஆஸ்திரேலிய அணி த்ரில் வெற்றி பெற்றது.

இதனையடுத்து டி20 உலக கோப்பையில் அரையிறுதிக்கு தகுதி பெறும் அணிகளில் ஆஸ்திரேலியா நீடித்திருக்கிறது. ஆஸ்திரேலியா அணி அரையிறுதிக்கு செல்லுமா? செல்லாதா? என்பதை நாளை நடக்கும் இங்கிலாந்து இலங்கை போட்டி பொறுத்துதான் முடிவு செய்யப்படும்.

குரூப் 1 பிரிவில் நாளை இங்கிலாந்து அணி வெற்றி பெற்றால் ஆஸ்திரேலியா வெளியேறும். நியூசிலாந்து மற்றும் இங்கிலாந்து அணிகள் அரையிறுதிக்கு தகுதி பெறும். ஏனென்றால் நியூசிலாந்து மற்றும் இங்கிலாந்து அணியின் நெட் ரன்ரேட் புள்ளிகள் ஆஸ்திரேலியவை விட அதிகம் என்பது குறிப்பிடத்தக்கது.