கடந்த மாதம் ஐந்தாம் தேதி பகுஜன் சமாஜ் கட்சியின் தமிழ்நாடு மாநில தலைவர் ஆம்ஸ்ட்ராங், பெரம்பூர் பகுதியில் வைத்து படுகொலை செய்யப்பட்டார். 

இந்த படுகொலை வழக்கில் தற்போது வரை 24 பேரை தனிப்படை போலீசார் சிபிசிஐடி போலீசார் கைது செய்து, அவர்களிடம் விசாரணை மேற்கொண்டு வருகின்றனர்.

கைது செய்யப்பட்டவர்களில் முதல் முக்கிய குற்றவாளியாக காங்கிரஸ் கட்சியின் முன்னாள் நிர்வாகி அஸ்வத்தாமன் கருதப்படுகிறார். மேலும், கடந்த வருடம் படுகொலை செய்யப்பட்ட ரவுடி ஆற்காடு சுரேஷின் தம்பி பாலு, சுரேஷின் மனைவி பொற்கொடி, பெண் தாதா மலர்கொடி, அஞ்சலை, ஹரிகரன் உள்ளிட்டவர்களும், அதிமுக, திமுக உள்ளிட்ட அரசியல் கட்சியை சேர்ந்த நிர்வாகிகளும் இந்த கொலை சம்பவத்தில் தொடர்பு இருப்பது சிபிசிஐடி போலீசாரின் விசாரணையில் வெளிவந்துள்ளது. 

மேலும், ஆம்ஸ்ட்ராங் படுகொலை வழக்கில் சிபிசிஐடி போலீசாரால் தேடப்பட்டு வரும் ரவுடி சம்போ செந்தில் மற்றும் அவரின் கூட்டாளி மொட்டை கிருஷ்ணன் ஆகியோர் வெளிநாடு தப்பி சென்றுள்ளதாக தெரிய வருகிறது.

இந்த நிலையில், மொட்டை கிருஷ்ணனுக்கு நெருங்கியவர்கள் யார்.. யார்? அவர் யார் யாரிடம் தொடர்பிலிருந்து உள்ளார் என்பது குறித்து சிபிசிஐடி போலீசார் விசாரணை மேற்கொண்டதில், பிரபல தமிழ் திரைப்பட இயக்குனர் நெல்சனின் மனைவி மோனிஷா, மொட்டை கிருஷ்ணனுக்கு அடிக்கடி போன் பேசியது தெரியவந்துள்ளது. 

மேலும் இருவரும் சம்பவம் நடந்த பிறகு பலமுறை செல்போன் தொடர்பில் இருந்து உள்ளதால், மொட்டை கிருஷ்ணனுக்கு மோனிஷா அடைக்கலம் கொடுத்திருக்கலாம் அல்லது அவர் வெளிநாடு தப்பி செல்ல உதவி செய்திருக்கலாம் என்ற கோணத்தில் போலீசார் விசாரணையை முடுக்கி உள்ளதாக தகவல் வெளியாகி உள்ளது. 

மேலும், இது குறித்து இயக்குனர் நெல்சன் இடமும் சிபிசிஐடி போலீசார் விசாரணை மேற்கொள்வார்கள் என்ற ஒரு தகவலும் தற்போது வெளியாகி உள்ளது.