கடலுக்கு மீன் பிடிக்கச் செல்லும் தமிழக மீனவர்களை இலங்கை கடற்படை எல்லைத் தாண்டி மீன்பிடிப்பதாக கூறி கைது செய்யும் சம்பவம் தொடர்கதையாகி வருகிறது.  

கடந்த 4-ந்தேதி ராமேசுவரத்தில் இருந்து 2 விசைப்படகுகளில் மீன்பிடிக்க சென்ற 14 மீனவர்களை எல்லை தாண்டி மீன்பிடித்ததாக கூறி இலங்கை கடற்படையினர் கைது செய்து சிறையில் அடைத்து, படகுகளையும் பறிமுதல் செய்தனர்.

இதையடுத்து இலங்கை சிறையில் சிக்கி தவிக்கும் தமிழக மீனவர்கள் அனைவரையும் விடுவிக்க நடவடிக்கை எடுக்க வேண்டும். மீன்பிடி படகுகளை மீட்க வேண்டும். மீனவர் பிரச்சினைகளுக்கு நிரந்தர தீர்வு காண வேண்டும் என்பது உள்ளிட்ட கோரிக்கைகளை வலியுறுத்தி நேற்று ராமேசுவரத்தில் விசைப்படகு மீனவர்கள் வேலை நிறுத்த போராட்டத்தில் ஈடுபட்டனர்.

இந்த நிலையில் ராமேஷ்வரம் மண்டபம் மீனவர்கள் எட்டு பேரை இலங்கை கடற்படை கைது செய்துள்ளதாக தகவல் தெரிவிக்கப்பட்டுள்ளது. அதாவது, நெடுந்தீவு அருகே மீன்பிடித்துக் கொண்டிருந்த மண்டபம் வடக்கு மீன்பிடி துறைமுக மீனவர்களை இலங்கை கடற்படை கைது செய்துள்ளது. 

இரண்டு விசைப்படகுகளுடன் கைதான மீனவர்கள் காங்கேசன் துறைமுக முகாமுக்கு அழைத்துச் செல்லப்பட்டனர். அங்கு விசாரணைக்குப் பின் தமிழக மீனவர்கள் யாழ்ப்பாணம் மீன்வளத்துறை அதிகாரிகளிடம் ஒப்படைக்கப்படுவர் என்று தெரிவிக்கப்பட்டுள்ளது.