திருமங்கலம் அருகே பூட்டி இருந்த வீட்டை அறிந்து கொள்ளையடித்த மர்ம கும்பலால் பரபரப்பு:

மதுரை: திருமங்கலம் அருகே மேலக்கோட்டை பகுதியில் உள்ள பாரதி நகரைச் சேர்ந்தவர் நாகராஜன். இவர் ஓய்வு பெற்ற வங்கி ஊழியர். இவரது மனைவி அறிவை. 

கடந்த ஒரு மாதமாக மனைவி அறிவை உடல் நலம் பாதிக்கப்பட்டதால் வீட்டை பூட்டிவிட்டு விருதுநகரில் உள்ள மருத்துவமனையில் மனைவியை சிகிச்சைக்காக சேர்த்து மனைவியுடன் நாகராஜன் மருத்துவமனையில் தங்கியிருந்தார்.

இந்நிலையில் நேற்றிரவு அவரது வீட்டின் முன் கதவு திறந்து இருப்பதாக அக்கம் பக்கத்தினர் நாகராஜன் தொலைபேசியில் தொடர்பு கொண்டு தகவல் தெரிவித்தனர்.

இதனால் அதிர்ச்சி அடைந்த நாகராஜன் உடனடியாக ஊருக்கு திரும்பி வந்து வீட்டை பார்த்தபோது முன் கதவு திறந்திருந்தது. உள்ளே சென்று பார்த்தபோது பீரோ உடைக்கப்பட்ட நிலையில் அதிலிருந்து 21 சவரன் தங்க நகைகள் மற்றும் 3 லட்சம் ரொக்க பணம் திருடு போயிருந்தது.

கடந்த சில நாட்களாக வீடு பூட்டி இருந்ததை அறிந்த மர்ம நபர்கள் கதவை உடைத்து உள்ளே புகுந்து பணம் மற்றும் நகைகளை திருடி சென்றதாக தெரியவந்தது.

இது குறித்து நாகராஜன் திருமங்கலம் தாலுகா காவல் நிலையத்திற்கு சென்று புகார் அளித்ததில் போலீசார், சம்பவ இடத்திற்கு வந்து விசாரணை நடத்தி அங்கு பதிவாகி இருந்த கை ரேகைகளை, கைரேகை நிபுணர்கள் மூலம் சேகரித்தனர். 

இந்த சம்பவம் குறித்து திருமங்கலம் போலீசார் வழக்கு பதிவு செய்து விசாரணை நடத்தி வருகின்றனர். மேலும் பூட்டி இருந்த வீட்டில் மர்ம நபர்களால் கொள்ளையடிக்கப்பட்ட சம்பவம் பகுதியில் பெரும் பரபரப்பை ஏற்படுத்தியுள்ளது.