தி.மு.க இளைஞரணி இரண்டாவது மாநில மாநாடு சேலத்தில் வருகின்ற டிசம்பர் மாதம் 17ஆம் தேதி நடைபெற உள்ளது. இதனை முன்னிட்டு தமிழகம் முழுவதும், மாநில தி.மு.க இளைஞரணி செயலாளரும் தமிழக விளையாட்டு துறை அமைச்சருமான உதயநிதி ஸ்டாலின் சுற்றுப்பயணம் மேற்கொள்ள உள்ளார். 

தூத்துக்குடியில் கடந்த மாதம் 4ஆம் தேதியும் தென்காசியில் 5 தேதியும் அவர் சுற்றுப்பயணம் மேற்கொண்டார். இந்நிலையில் அமைச்சர் உதயநிதி ஸ்டாலின் நெல்லை, குமரி மாவட்டங்களில் வருகின்ற 17ஆம் தேதி முதல் 2 நாட்கள் சுற்றுப்பயணம் மேற்கொள்கிறார். 

கன்னியாகுமரி மாவட்டத்தில் நடைபெறும் கட்சி நிகழ்ச்சிகள் மற்றும் மதியம் நடைபெறும் அரசு நிகழ்ச்சிகளில் வருகின்ற 17ஆம் தேதி பங்கேற்க உள்ளார். 

அன்று மாலை நெல்லை புறப்படும் உதயநிதி ஸ்டாலினை நெல்லை மாவட்ட எல்லை பகுதியில் மாவட்ட தி.மு.க செயலாளர், மத்திய மாவட்ட பொறுப்பாளர் ஆகியோர் தலைமையில் கட்சி நிர்வாகிகள் உற்சாக வரவேற்பு அளிக்கின்றனர். 

பின்னர் வண்ணாரப்பேட்டையில் உள்ள ஒரு ஹோட்டலில் இரவு தங்கி மறுநாள் காலை வர்த்தக மையத்தில் தி.மு.க மூத்த முன்னோடிகளுக்கு பொற்கிழி வழங்கும் விழாவில் கலந்து கொண்டு பேசுகிறார். 

இதனை தொடர்ந்து 18 ஆம் தேதி மாலை திருநெல்வேலி நகரில் உள்ள பள்ளி மைதானத்தில் நடைபெறும் தி.மு.க செயல் வீரர்கள் கூட்டத்தில் கலந்துகொண்டு இளைஞர்கள் மற்றும் நிர்வாகிகள் இடையே உரையாற்றுகிறார். 

அமைச்சர் உதயநிதி வருகையை ஒட்டி திருநெல்வேலி மாவட்டம் முழுவதும் தி.மு.க தொண்டர்கள் உற்சாகமடைந்துள்ளனர். அவர்கள் உதயநிதி ஸ்டாலினுக்கு வரவேற்பளிக்க பல்வேறு பணிகளை மேற்கொண்டு வருகின்றனர்.