கோவை மாவட்டம் ஆவாரம்பாளையத்தில் கடந்த சில நாட்களுக்கு முன்பு சத்திய பாண்டியன் என்பவரை துரத்திச் சென்ற ஒரு கும்பல் அறிவரால் வெட்டியும் துப்பாக்கியால் சுட்டும் கொலை செய்து விட்டு தப்பி சென்றனர். இந்த சம்பவம் கோவை மாவட்டத்தில் பெரும் பரபரப்பை ஏற்படுத்திய நிலையில் இந்த சம்பவத்தில் தொடர்புடைய 5 பேரை காவல்துறையினர் தீவிரமாக தேடி வந்தனர்.

இந்த நிலையில் கொலை சம்பவத்தில் தொடர்புடைய நான்கு பேர் அரக்கோணம் நீதிமன்றத்திலும், கூலிப்படையின் தலைவனான சஞ்சய் ராஜா சென்னை நீதிமன்றத்திலும் சரணடைந்தனர். இதனைத் தொடர்ந்து சஞ்சய் ராஜாவிடம் இருந்து இரண்டு சீன தயாரிப்பு துப்பாக்கிகளை போலீசார் பறிமுதல் செய்தனர். 

இதற்கிடையே கொலை சம்பவம் நடைபெற்ற ஆவாரம்பாளையம் கரட்டுமடம் பகுதிக்கு ரவுடி சஞ்சய் ராஜாவை விசாரணைக்காக காவல்துறையினர் அழைத்துச் சென்றுள்ளனர். அப்பொழுது காவல்துறையினரை நோக்கி தான் மறைத்து வைத்திருந்த துப்பாக்கியால் போலீசார் மீது துப்பாக்கி சூடு நடத்திவிட்டு சஞ்சய் ராஜா தப்ப முயன்று உள்ளார்.

இதனால் போலீசார் சஞ்சய் ராஜா மீது துப்பாக்கிச் சூடு நடத்தியுள்ளனர். இந்த துப்பாக்கி சூட்டில் சஞ்சய் ராஜாவின் முழங்காலில் குண்டு பாய்ந்தது. இதனை தொடர்ந்து அவரை கைது செய்த போலீசார் கோவை அரசு மருத்துவமனையில் சிகிச்சைக்காக அனுமதித்துள்ளனர். இச்சம்பவம் கோவையில் பெரும் பரபரப்பை ஏற்படுத்தியுள்ளது.