இந்திய அளவில் முதலிடம் பிடித்த பிரக்ஞானந்தா! குவியும் பாராட்டு!

தேசிய செஸ் வீரர்கள் தரவரிசைப் பட்டியலில் தமிழகத்தைச் சேர்ந்த இளம் வீரர் பிரக்ஞானந்தா முதலிடம் பிடித்து சாதனை படைத்துள்ளார்.

நெதர்லாந்தில் நடைபெற்று வரும் டாடா ஸ்டீல் மாஸ்டர்ஸ் தொடரில் நடப்பு உலகச் சாம்பியனான சீனாவின் டிங் லிரனை பிரக்ஞானந்தா வீழ்த்தியுள்ளார்.

இதன் மூலம் இந்திய செஸ் வீரர்கள் தரவரிசைப் பட்டியலில் பிரக்ஞானந்தா முதன்முறையாக முதலிடத்திற்கு முன்னேறியுள்ளார்.

தேசிய செஸ் வீரர்கள் தரவரிசைப் பட்டியலில் முதலிடம் பிடித்து சாதனை படைத்துள்ள பிரக்ஞானந்தாவுக்கு பல்வேறு தரப்பிலிருந்தும் பாராட்டுக்கள் குவிந்து வருகின்றன.

இந்நிலையில், அம்மா மக்கள் முன்னேற்றக்கழகத்தின் பொதுச்செயலாளர் டிடிவி தினகரன் விடுத்துள்ள வாழ்த்துச் செய்தியில், "இளம் வயதிலேயே சதுரங்க உலகில் புதிய அத்தியாயத்தை தொடங்கி அதில் வெற்றிநடை போட்டுக் கொண்டிருக்கும் இந்தியாவின் நம்பிக்கை நட்சத்திரம் பிரக்ஞானந்தா அவர்கள், உலகளவில் அடுத்தடுத்து பல்வேறு வெற்றிகளை குவிக்க எனது மனமார்ந்த பாராட்டுக்களையும், வாழ்த்துக்களையும் தெரிவித்துக் கொள்கிறேன்" என்று டிடிவி தினகரன் தெரிவித்துள்ளார்.