அமெரிக்காவின் முன்னாள் அதிபரும், அடுத்த மாதம் மீண்டும் பதவியேற்க உள்ளவருமான டொனால்டு டிரம்ப், இந்தியாவுக்கு வரி விதிப்பது தொடர்பாக கருத்து தெரிவித்துள்ளார். இந்தியா சில அமெரிக்க பொருட்களுக்கு அதிக வரி விதிக்கிறது என அவர் குற்றம் சாட்டி, அமெரிக்காவும் இதற்கு பதிலளிக்க அதே அளவு வரி விதிக்கத் தயார் என தெரிவித்துள்ளார்.

இது குறித்து டிரம்ப் தெரிவித்ததாவது,
"இந்தியா எங்களுக்கு 100% வரி விதிக்கிறது. நாங்களும் அதே அளவு அவர்களுக்கு வரி விதிக்க முடிவு செய்கிறோம். பரஸ்பரம் என்ற வார்த்தை மிக முக்கியமானது. அவர்கள் எங்களுக்கு வரி விதித்தால், நாங்களும் அவர்களுக்கு அதே அளவு வரி விதிக்க வேண்டும்," என்று கூறினார்.

மேலும், இந்தியா மட்டுமின்றி பிரேசில் போன்ற நாடுகளும் அமெரிக்க பொருட்களுக்கு அதிக வரி விதிக்கின்றன என்றும், இதை சமன் செய்ய அமெரிக்காவும் அதே அளவிலான வரியை விதிக்கப் போவதாக டிரம்ப் குறிப்பிட்டார்.

இவ்வாறு இந்தியாவுக்கு எதிரான வர்த்தகக் கொள்கைகளில் கடுமையான நிலைப்பாட்டை முன்வைத்த டிரம்ப், பரஸ்பர நிபந்தனைகள் (Reciprocity) தான் அமெரிக்க வணிக கொள்கையின் அடிப்படை அம்சமாக இருக்கும் என்று வலியுறுத்தினார்.

இந்த கருத்துக்கள் இந்தியா-அமெரிக்கா வணிக உறவுகளில் புதிய பரபரப்பை ஏற்படுத்தியுள்ளன. இதற்கிடையில், இந்தியா இதுகுறித்து எந்தவித பதிலும் அளிக்காமல் இருக்கும் நிலை தொடர்கிறது.

இந்தியாவுக்கும் அமெரிக்காவுக்கும் இடையிலான வர்த்தக மோதல்களில் பேச்சுவார்த்தை மூலம் சமரசம் ஏற்படுமா, அல்லது இது புதிய முடிச்சுகளுக்கு வழிவகுக்கும் என எதிர்பார்ப்பு எழுந்துள்ளது.