ரிசர்வ் வங்கியின் நிதிக் கொள்கைக் குழு (MPC) கூட்டம் இரண்டு மாதங்களுக்கு ஒருமுறை நடைபெறுவது வழக்கம். இந்த கூட்டத்தில், வங்கிகள் ரிசர்வ் வங்கியிலிருந்து பெறும் கடன்களுக்கு விதிக்கப்படும் வட்டி விகிதம் (ரெப்போ ரேட்), வங்கிகள் செலுத்த வேண்டிய கட்டாய கையிருப்பு விகிதம் (CRR) உள்ளிட்ட பொருளாதார நடவடிக்கைகள் குறித்த முக்கிய முடிவுகள் எடுக்கப்படும்.

பணவீக்கம் குறைந்து வருமா?

பிப்ரவரி மாதத்திலேயே சில்லறை பணவீக்கம் 3.6% ஆக குறைந்தது. மார்ச் மாதத்திலும் பணவீக்கம் ரிசர்வ் வங்கியின் இலக்கு விகிதமான 4% க்கும் கீழாக காணப்படுகிறது. பணவீக்கம் கட்டுக்குள் வந்துள்ளதால், வட்டி விகிதங்களில் மீண்டும் குறைப்புக்கான வாய்ப்பு இருப்பதாக HSBC நிறுவனம் தெரிவித்துள்ளது.

ஏப்ரல் மாத நிதிக் கொள்கை கூட்டத்தில் மாற்றமா?

மத்திய வங்கி ஏற்கனவே வட்டி விகிதக் குறைப்பு சுழற்சியில் உள்ளது. இதை தொடர்ந்து, ஏப்ரல் கூட்டத்தில் 25 அடிப்படை புள்ளிகள் (0.25%) குறைக்க திட்டமிடப்பட்டுள்ளது. இதனால் ரெப்போ விகிதம் 6% ஆக மாற்றப்படும் என HSBC கணிக்கிறது.

உணவுப் பொருட்களின் விலை நிலவரம்

• காய்கறிகள், பருப்பு வகைகள், முட்டை, மீன், இறைச்சி ஆகியவற்றின் விலைகள் குறைந்துள்ளதால், உணவுப் பணவீக்கம் தொடர்ந்து இரண்டாவது மாதமாக சரிவைக் கண்டுள்ளது.
• ஆனால், தானியங்கள், சர்க்கரை மற்றும் பழங்களின் விலை உயர்ந்துள்ளது என்று அறிக்கையில் குறிப்பிடப்பட்டுள்ளது.

சர்வதேச பொருளாதார நிலைமை

உலகளவில் பல நாடுகளின் பொருளாதாரங்கள் சிக்கல்களை சந்தித்துள்ளன. எனினும், இந்திய பொருளாதாரம் மற்ற நாடுகளை ஒப்பிடுகையில் உறுதியாகவே உள்ளது.