3வது சுற்று வட்ட பாதையில் நுழைந்தது ஆதித்யா எல்1..!

கடந்த செப்டம்பர் 2-ம் தேதி பி.எஸ்.எல்.வி. சி-57 ராக்கெட் 1,480 கிலோ எடை கொண்ட 'ஆதித்யா எல்-1' விண்கலத்தை சுமந்து கொண்டு வெற்றிகரமாக விண்ணில் பாய்ந்தது. இந்த ராக்கெட் பூமியில் இருந்து புறப்பட்ட அடுத்த 1 மணி நேரம் 3 நிமிடங்களில் அதில் இருந்து 'ஆதித்யா எல்1' விண்கலம் வெற்றிகரமாக பிரிந்து சென்றது. 

அதன் பின்னர் இந்த விண்கலம் புவிவட்டப்பாதையில் தனது பயணத்தை தொடர்ந்து கடந்த 5-ஆம் தேதி  விண்கலத்தின் புவி சுற்று வட்டப்பாதை உயரம் 2-வது முறையாக அதிகரிக்கப்பட்டது. இதையடுத்து ஆதித்யா எல்1' விண்கலம் அடுத்தகட்ட உயரத்திற்கு கொண்டுச் செல்வதற்கான நடவடிக்கையில் ஈடுபட்டது.

இந்த நிலையில் ஆதித்யா எல்-1 விண்கலத்தின் புவி சுற்று வட்டப்பாதை உயரம் மூன்றாவது முறையாக அதிகரிக்கப்பட்டுள்ளதாக இஸ்ரோ தெரிவித்துள்ளது. இதுதொடர்பாக இஸ்ரோ தனது ட்விட்டர் வலைதளத்தில் தெரிவித்துள்ளதாவது:- 

"ஆதித்யா-எல்1 மிஷன்: புவி சுற்று வட்டப்பாதை உயரம் 3-வது முறையாக (EBN#3) பெங்களூரு ISTRAC இலிருந்து வெற்றிகரமாக நிகழ்த்தப்பட்டது. மொரீஷியஸ், பெங்களூரு, SDSC-SHAR மற்றும் போர்ட் பிளேரில் உள்ள இஸ்ரோவின் தரை நிலையங்கள் இந்த செயல்பாட்டின் போது செயற்கைக்கோளைக் கண்காணித்தன. 

புதிய சுற்றுப்பாதையை அடைந்தது. 296 கிமீ x 71767 கிமீ ஆகும். அடுத்த அதிகரிப்பு (EBN#4) செப்டம்பர் 15-ஆம் தேதியன்று மதியம் 02:00 மணி IST இல் திட்டமிடப்பட்டுள்ளது" என்று அந்தப் பதிவில் பதிவிடப்பட்டுள்ளது.