சத்தீஸ்கர் மாநிலத்தின் ஜாஷ்பூர் மாவட்டத்தில் பாஜக எம்எல்ஏ ரேமுனி பகத் மீது, இயேசு கிறிஸ்து மற்றும் மதமாற்றம் குறித்து ஆட்சேபகரமான கருத்துகள் தெரிவித்ததாக குற்றம் சாட்டப்பட்டுள்ள விவகாரம் தற்போது சர்ச்சையாக மாறியுள்ளது.

கடந்த ஆண்டு செப்டம்பர் 1ஆம் தேதி, ஜாஷ்பூர் சட்டமன்ற தொகுதியின் தெக்னி கிராமத்தில் நடைபெற்ற நிகழ்ச்சியில் பாஜக எம்எல்ஏ ரேமுனி பகத் கலந்துகொண்டார். அப்போது அவர் இயேசு கிறிஸ்து மற்றும் கிறிஸ்தவ மதமாற்றம் தொடர்பாக சர்ச்சைக்குரிய கருத்துகளை வெளியிட்டதாக கூறப்படுகிறது.

இந்த கருத்துக்கள் சமூக ஊடகங்களில் வைரலாக பரவின. இதைத் தொடர்ந்து, கிறிஸ்தவ அமைப்புகள் ஜாஷ்பூர் காவல் நிலையங்களில் பல புகார்கள் அளித்தன. ஆனால், இதற்கான எந்த நடவடிக்கையும் போலீசார் எடுக்கவில்லை.

போலிஸாரின் அமைதியான நிலைப்பாடு காரணமாக, இந்த விவகாரம் நீதிமன்றத்தின் கவனத்திற்கு கொண்டுவரப்பட்டது. ஜாஷ்பூர் மாவட்ட நீதிமன்றம் இந்த வழக்கை விசாரித்து, சம்பந்தப்பட்ட வீடியோ மற்றும் வாக்குமூலங்களை ஆராய்ந்தது.

இதன் அடிப்படையில், ரேமுனி பகத் மீது கிரிமினல் வழக்கு பதிவு செய்ய வேண்டும் என்றும், அவரது கருத்துகள் சமூகத்திலிருக்கும் இரு மதக் குழுக்களுக்கு இடையே பகைமையை தூண்டும் வகையில் இருப்பதாகவும் நீதிமன்றம் தெரிவித்துள்ளது.

அதேசமயம், எம்எல்ஏ ரேமுனி பகத் இந்த வழக்கில் வரும் ஜனவரி 10ஆம் தேதி நேரில் ஆஜராகி விளக்கம் அளிக்குமாறு நீதிமன்றம் சம்மன் அனுப்பியுள்ளது.

இந்த விவகாரம் அரசியல் மற்றும் மதவியல் மோதல்களை உருவாக்கியுள்ள நிலையில், கிறிஸ்தவ அமைப்புகள் நீதிமன்றத்தின் தீர்மானத்தை வரவேற்றுள்ளன. அதேவேளையில், பாஜகவின் சார்பில் இது குறித்து எந்த அதிகாரப்பூர்வ பதிலும் இதுவரை வெளிவரவில்லை.

இந்த வழக்கு சட்டரீதியாக மட்டுமன்றி, சமூக அரசியலிலும் விவாதத்தை ஏற்படுத்தியுள்ளது. ஜாஷ்பூரில் இதனுடன் தொடர்புடைய நிலைமை பரபரப்பாக உள்ளது.