பாஜகவினருக்கு நல்ல பாடத்தை புகுட்டுவோம்-காங்கிரசின் முன்னாள் முதலமைச்சர் எச்சரிக்கை..!

கர்நாடக மாநிலத்தின் காங்கிரஸ் கட்சியின் முன்னாள் முதலமைச்சர் மற்றும் சட்டசபை எதிர்க்கட்சி தலைவராக இருப்பவர் சித்தராமையா. சங்பரிவார் அமைப்பின் வீர் சாவர்க்கரை பற்றி பேசியதற்காக இவருக்கு மிரட்டல் விடப்பட்டுள்ளது. 

கர்நாடகாவில் பெய்த கனமழையால் அம்மாநிலத்தில் பாதிக்கப்பட்ட மடினாடு மற்றும் கோயனாடு ஆகிய பகுதிகளை பார்வையிட சென்ற சித்தராமையாவுக்கு எதிராக பா.ஜ.க.வினர் கோஷங்களை எழுப்பியும், கருப்பு கொடி காட்டியும் எதிர்ப்புகளை தெரிவித்தனர். மேலும் அவர், குடகு பகுதிக்கு சென்றபோதும் பாஜக-வினர் எதிர்ப்பு தெரிவித்து போராட்டத்திலும் ஈடுபட்டனர். 

பா.ஜ.க.வினரின் இந்த எதிர்ப்பு போராட்டத்தினால் சித்தராமையா சென்ற கார் மீது முட்டைகளும் வீசப்பட்டதாக காங்கிரஸ் தெரிவித்துள்ளது. இந்த சம்பவத்தில் ஈடுபட்ட நபர்களை கைது செய்ய வலியுறுத்தி காங்கிரஸ் தொண்டர்களும் போராட்டத்தில் ஈடுபட்டனர். 

இதனை தொடர்ந்து ஆளும்கட்சியான பா.ஜ.க.வின் முதலமைச்சர் பசவராஜ் பொம்மை, தீவிர விசாரணைக்கு உத்தரவிட்டுள்ளார். சம்பவத்தில் தொடர்புடைய பதினாறு பேர் குடகு நகரில் கைது செய்யப்பட்டு உள்ளனர். அவர்களில் ஒன்பது பேர் குஷால்நகர் பகுதியையும் மற்ற ஏழு பேர் மடிகேரி பகுதியையும் சேர்ந்தவர்கள் என்று தெரியவந்தது. அவர்கள் கோர்ட்டில் ஒப்படைக்கப்படுவார்கள் என்று தெரிவிக்கப்பட்டுள்ளது. 

இதுபற்றி சித்தராமையா தெரிவிக்கும்போது, பா.ஜ.க.வினர் ஆட்களை வாடகைக்கு அமர்த்தி தனக்கு எதிராக போராட்டத்தில் ஈடுபட செய்கின்றனர் என்று தெரிவித்துள்ளார். 

 எதிர்வரும் சட்டசபை தேர்தலில் வெற்றி பெற்று ஆட்சி அதிகாரத்திற்கு வந்தபின்பு, இதற்காண பாடத்தை அவர்களுக்கு புகட்டுவோம் என்றும் சித்தராமையா எச்சரிக்கை விடுத்துள்ளார்.