அசாமில் உள்ள புகழ்பெற்ற காசிரங்கா தேசிய பூங்காவில் தற்போது உலகின் மிக அரிய உயிரினங்களில் ஒன்றான தங்கப் புலி கண்டறியப்பட்டுள்ளது. இதுகுறித்து மத்திய வனத்துறை அமைச்சர் ஜோதிராதித்ய சிந்தியா, தனது சமூக வலைதளத்தில் அதிசயத்தையும், பாதுகாப்பு அவசியத்தையும் வலியுறுத்தும் வகையில், அரிய தங்கப் புலியின் அழகிய புகைப்படங்களை பகிர்ந்துள்ளார்.

இந்த தங்கப் புலி (Golden Tiger), ஒரு மரபணு மாற்றம் (genetic mutation) காரணமாக உருவாகும் புலியின் அரிய வகை. வழக்கமான ராயல் பெங்கால் புலிகளைப் போல அல்லாமல், இவை வெளிர் தங்க நிற ரோமங்களும், மங்கலான கருப்பு கோடுகளும் கொண்டிருக்கும்.

இந்த வகை புலிகள் உலகளவில் 30க்கும் குறைவாக உள்ளதாக வனவிலங்கு ஆராய்ச்சியாளர்கள் தெரிவிக்கின்றனர். இந்தியாவில் முதன்முறையாக 2014ஆம் ஆண்டில் இத்தகைய புலி இருப்பது உறுதி செய்யப்பட்டது.

புகைப்படக் கலைஞர் சுதிர் சிவராம் எடுத்துள்ள இந்த புகைப்படங்கள் தற்போது சமூக வலைதளங்களில் வைரலாகி வருகின்றன. தங்க நிறத்தில் ஒளிரும் அந்த புலியின் காட்சிகள், கண்ணைக் கவரும் அழகுடன் மட்டுமல்லாமல், அதன் அபூர்வ தன்மையையும் வெளிப்படுத்துகின்றன.

சிந்தியா வெளியிட்ட பதிவு:“இந்த அற்புதமான உயிரினத்தை பார்வையிடும் வாய்ப்பு மிக அரிய ஒன்று. இதைப் பாதுகாப்பது நம் கடமை.” என அவர் கூறியுள்ளார்.

430 சதுர கிலோமீட்டர் பரப்பளவில் பரந்துள்ள இந்த தேசிய பூங்கா, ஏராளமான உயிரினங்களின் பாதுகாப்பிடமாக செயல்பட்டு வருகிறது. இந்திய ஒற்றைக்கொம்பு காண்டாமிருகம், ராயல் பெங்கால் புலி, பல வகை மான்கள், மற்றும் பல்லாயிரக்கணக்கான பறவைகள் இங்கு வாழ்கின்றன.

இந்த பூங்கா உலகிலேயே பெரும் புலி அடர்த்தியைக் கொண்ட இடமாகவும், யுனெஸ்கோ உலக மரபுசொத்து பட்டியலிலும் இடம்பெற்றுள்ளதும் குறிப்பிடத்தக்கது.

அண்மையில், கிரிக்கெட் ஜாம்பவான் சச்சின் டெண்டுல்கர், தனது குடும்பத்துடன் காசிரங்கா பூங்காவில் ஜீப் சவாரி செய்துள்ளார்.அவர் குடும்பத்துடன் பயணித்தபோது, தங்கப் புலி, ராயல் பெங்கால் புலி மற்றும் காண்டாமிருகங்களை நேரில் காணும் அதிர்ஷ்டத்தை பெற்றிருந்ததாகவும் தகவல்கள் வெளியாகியுள்ளன.

இந்த அரிய உயிரினமான தங்கப் புலி, நம் நாட்டின் உயிர் வளத்தின் பெருமையை அடையாளப்படுத்தும் ஒன்று. இதைப் போன்ற உயிரினங்களை பாதுகாக்க அரசு மட்டுமல்லாமல் ஒவ்வொரு குடிமகனும் முக்கிய பங்கு வகிக்க வேண்டும் என்பது நிச்சயம்.
மத்திய அமைச்சரின் விழிப்புணர்வும், புகைப்படங்களும் தற்போது சமூகத்தில் வனவிலங்கு பாதுகாப்பு மீதான கவனத்தை மீண்டும் எழுப்பியுள்ளன.