புதுடெல்லி: இந்தியாவில் கடந்த சில நாட்களாக விமான சேவைகள் தொடர்ச்சியாக குண்டு மிரட்டல்களுக்கு ஆளாகி, பயணிகளுக்கு பெரும் சிரமத்தை ஏற்படுத்தி வருகிறது. கடந்த 12 நாட்களுக்குள் இந்திய விமான நிறுவனங்களின் 275-க்கும் மேற்பட்ட விமானங்களுக்கு குண்டு மிரட்டல்கள் வந்துள்ளன.

இதனால் பல்வேறு விமான நிலையங்களில் அவசர சோதனைகள் மேற்கொள்ளப்பட்டு, பயண நேரம் மாற்றப்படவோ, கடுமையான பாதுகாப்பு நடவடிக்கைகள் எடுக்கப்படவோ செய்யப்பட்டுள்ளது.

நேற்று மட்டும் 25-க்கும் மேற்பட்ட உள்நாட்டு மற்றும் சர்வதேச விமானங்களுக்கு குண்டு மிரட்டல் வந்தது. இதன் காரணமாக டெல்லி, மும்பை, ஹைதராபாத், கோழிக்கோடு உள்ளிட்ட முக்கிய விமான நிலையங்களில் பரபரப்பான நிலை காணப்பட்டது.

குறிப்பாக, இண்டிகோ, விஸ்தாரா, ஸ்பைஸ்ஜெட், ஏர் இந்தியா உள்ளிட்ட விமான நிறுவனங்களின் விமானங்கள் இந்த மிரட்டலுக்கு உள்ளானது. இண்டிகோ விமான நிறுவனத்தின் டெல்லி - இஸ்தான்புல், ஜெட்டா - மும்பை, மும்பை - இஸ்தான்புல், ஹைதராபாத் - சண்டிகர், புனே - ஜோத்பூர், கோழிக்கோடு - தம்மம், உதய்பூர் - டெல்லி போன்ற விமானங்கள் கூட குண்டு மிரட்டலுக்கு உள்ளாகின.

இந்த மிரட்டல்களால் பயணிகள் மிகுந்த அவதிக்கு ஆளாகின்றனர். கடுமையான பாதுகாப்பு சோதனைகள் மற்றும் அவசர தரையிறக்கங்கள் மேற்கொள்ளப்படுவதால், ஒவ்வொரு முறை எதுவும் நடைபெறாமல் போகும்போதும், விமான நிறுவனங்கள் ரூ.3 கோடி வரையிலான இழப்புகளை சந்திக்கின்றன.

பெரும்பாலான மிரட்டல்கள் சமூக வலைதளங்கள் வழியாகவே வந்துள்ளதாக தகவல் தெரிவிக்கப்படுகிறது. இதையடுத்து, மத்திய அரசு மெட்டா, எக்ஸ் போன்ற சமூக வலைதள நிறுவனங்களுக்கு அனுப்பிய வேண்டுகோள் மூலம் குண்டு மிரட்டல்களுக்கான தரவுகளை பகிர்ந்து கொள்ளுமாறு கேட்டுக்கொண்டுள்ளது. இம்மிரட்டல்களை கிளப்பும் மர்ம நபர்களை கண்டுபிடிக்க தீவிர நடவடிக்கை எடுக்கப்பட்டு வருகிறது. சைபர் கிரைம் போலீஸார் இந்த விசாரணையில் தீவிரமாக ஈடுபட்டு வருகின்றனர்.