சென்னை, கிண்டி ராஜ்பவனில் தமிழக ஆளுநர் ஆர்.என்.ரவி உடன் மாநில பாஜக தலைவர் அண்ணாமலை சந்தித்து புகார் மனுவை கொடுத்துள்ளார்.

குறிப்பாக, விஷச்சாராய மரணம் குறித்து உரிய விசாரணை நடத்த உத்தரவிட வேண்டும், அமைச்சரவையில் இருந்து செந்தில் பாலாஜியை நீக்க வேண்டும் உள்ளிட்ட கோரிக்கைகளை மனுவாக ஆளுநரிடம் அண்ணாமலை நேரில் கொடுத்தார்.

பின்னர் செய்தியாளர்களை சந்தித்த அண்ணாமலை தெரிவித்தாவது, ''அமைச்சர் அரசியல் அமைப்பு சட்டத்தை மீறினால் ஆளுநர் நடவடிக்கை எடுக்கலாம்.

அந்த வகையில், அமைச்சர் செந்தில் பாலாஜி அவர்கள் தமிழ்நாடு அமைச்சரவையில் தொடர்வதற்கு தகுதியில்லாதவராக இருக்கிறார்.

அவரை உடனடியாக விடுவிக்க வேண்டும் என்று, ஆளுநர் அவர்கள் முதலமைச்சருக்கு தெரிவிக்க வேண்டும் என்று வலியுறுத்தியுள்ளோம்" என்றார்.  

முன்னதாக, வேலைவாங்கி தருவதாக பணமோசடி செய்த வழக்கில் செந்தில் பாலாஜியை விசாரணை செய்ய தமிழக காவல்துறைக்கு உச்ச நீதிமன்றம் உத்தரவிட்டு இருந்தது.

பொறுப்பு மிக்க ஒரு அமைச்சர் பணத்தை வாங்கியது ஊழல் தான், அதை திருப்பிக் கொடுப்பதற்கோ, சமாதானம் செய்வதற்கோ இங்கு அனுமதி கிடையாது என்றும், செந்தில் பாலாஜி அவர்கள் மீது அமலாக்கத்துறை வழக்கை தொடரலாம் என்றும் அந்த தீர்ப்பில் உச்சநீதிமன்றம் தெரிவித்திருந்தது குறிப்பிடத்தக்கது.