நீண்ட தூர பயணம் மேற்கொள்ளும் பயணிகளின் வசதிக்காக பேருந்துகளை நிறுத்திச் செல்லும் வகையிலான பயண வழி உணவக பட்டியலை போக்குவரத்து துறை வெளியிட்டுள்ளது. 

தமிழக அரசு விரைவு போக்குவரத்து கழகம் சார்பில் அனைத்து போக்குவரத்து கிளை மேலாளர்கள் உள்ளிட்டோருக்கு அனுப்பியுள்ள சுற்றறிக்கையில், பேருந்து பயணத்தின் போது சாலைவழி உணவகங்களில் தரமற்ற உணவு வழங்கப்படுவதாக வந்த புகாரின் அடிப்படையில், தரமற்ற உணவு வழங்கிய உணவகங்களில் பேருந்துகளை நிறுத்தக் கூடாது என ஏற்கனவே உத்தரவிடப்பட்டுள்ளது.

இந்த உத்தரவை தொடர்ந்து, தற்போது நீண்ட தூர பேருந்து பயணம் மேற்கொள்ளும் பயணிகளின் வசதிகளுக்காக நெடுஞ்சாலைகளில் பேருந்துகளை நிறுத்துவதற்கு வசதியாக உள்ள பதினெட்டு உணவகங்கள் குறித்த விவரங்கள் அளிக்கப்பட்டுள்ளதாக தெரிவிக்கப்பட்டுள்ளது.

குறிப்பாக சென்னையில் இருந்து சேலம், திருச்சி மார்க்கமாக செல்லும் பேருந்துகள் போக்குவரத்து துறை சார்பில் அறிவிக்கப்பட்டுள்ள 18 உணவகங்களில் மட்டுமே பேருந்துகளை நிறுத்த வேண்டும் என அந்த உத்தரவில் தெரிவிக்கப்பட்டுள்ளது.

இவற்றில் எந்தவித புகாரும் இன்றி பேருந்துகளை நிறுத்தி செல்ல அனைத்து ஓட்டுனர் நடத்துனர்கள் இதன்மூலம் கேட்டுக்கொள்ளப்படுகிறார்கள் என்றும், இதனை கிளை மேலாளர்கள், கோட்ட மேலாளர், துணை மேலாளர்கள் மற்றும் அனைத்து உதவி மேலாளர்கள் ஆகியோர் எந்தவித குறைபாடும் இன்றி செயல்படுத்த வேண்டும் என்றும் உத்தரவிடப்பட்டுள்ளது.

பல்வேறு ஊர்களில் இருந்து சென்னை நோக்கி இயக்கப்படும் பேருந்துகள் தற்போது உளுந்தூர்பேட்டை - விழுப்புரம் இடையே அமைந்துள்ள தனியார் உணவகத்தில் நிறுத்த அனுமதி அளிக்கப்பட்டுள்ளது என்றும் தினசரி இருபுறமும் பேருந்து இயக்கிய விவரம், உணவகத்தில் நின்ற விவரம் பணிமனை வாரியாக கைபேசி செயலி மூலம் அனைத்து தொழிலாளர்களும் தலைமையகத்திற்கு தெரிவிக்க வேண்டும் எனவும் அந்த உத்தரவில் தெரிவிக்கப்பட்டுள்ளது.

மேலும் விழுப்புரம் உதவி மேலாளர் பணிமனை வாரியாக சம்பந்தப்பட்ட உணவகத்தில் நின்ற பேருந்துகளின் விவரத்தை தினசரி தெரிவிக்க வேண்டும் எனவும், அனைத்து கிளை மேலாளர்கள் சம்பந்தபட்ட உணவகங்களில் பேருந்தை நிறுத்த தக்க நடவடிக்கை மேற்கொள்ள வேண்டும் எனவும் அந்த உத்தரவில் தெரிவிக்கப்பட்டுள்ளது.