தமிழக வெற்றி கழகத்தின் முதல் மாநில மாநாடு விழுப்புரம் மாவட்டம்,  விக்கிரவாண்டி வி.சாலையில் 27-ம் தேதி  நடைபெற்றது. இந்த மாநாட்டில் பங்கேற்ற தமிழக வெற்றி கழகத்தின் கொள்கைகள் வெளியிடப்பட்டது.

இதற்கிடையே, பொது மக்களை நேரடியாக சந்திப்பதற்காக  தமிழக வெற்றி கழக தலைவர் விஜய் சுற்றுப்பயணம் மேற்கொள்ள உள்ளதாக தகவல் வெளியாகி உள்ளது. அதன்படி கோவையில் அடுத்த மாதம் 27-ம் தேதி முதல் பயணத்தை மேற்கொள்ள உள்ளதாகவும், அப்போது கட்சியின் கொள்கை குறித்து பொதுமக்களுக்கு எடுத்து கூற உள்ளதாக சொல்லப்படுகிறது.

இந்த நிலையில், நடிகர் ரஜினிகாந்தின் சகோதரர் சத்திய நாராயண ராவ் மதுரை மீனாட்சியம்மன் கோவிலில் சாமி தரிசனத்திற்கு பின்னர் செய்தியாளர்களை சந்தித்தார். அப்போது அவரிடம் விஜயின் அரசியல் வருகை குறித்து செய்தியாளர்கள் எழுப்பிய கேள்விக்கு பதிலளித்து பேசிய அவர், வரட்டும், கமலை போல் விஜய் முயற்சி செய்து பார்க்கட்டும் என்றும், விஜய் தற்போது அரசியலுக்கு வந்து எந்த பிரயோஜனமும் இல்லை என்றும், விஜயால் அரசியலில் சாதிக்க வாய்ப்பு இல்லை என்று கூறினார்.

மேலும் அரசியல் ஆசையால் நடிகர் விஜய் அரசியலுக்கு வந்துள்ள நிலையில், இன்னும் கொஞ்ச நாள் போகட்டும் அவரின் செயல்பாடுகளை பார்க்கலாம் என்றும், ஆனால் தமிழ்நாட்டில் விஜயால் ஜெயிக்க முடியாது. அது கஷ்டம் என்று கூறியுள்ளார்.