ஐசிசி ஒருநாள் கிரிக்கெட் உலகக் கோப்பை தொடரில் இன்று இரண்டு லீக் ஆட்டங்கள் நடக்கின்றன. இதில், பெங்களூரு சின்னசாமி மைதானத்தில் நியூஸிலாந்து - பாகிஸ்தான் அணிகளுக்கு இடையேயான லீக் ஆட்டம் பரபரப்பான கட்டத்தை எட்டியுள்ளது.

இந்த ஆட்டத்தில் டாஸ் வென்ற பாகிஸ்தான் அணி முதலில் பந்துவீச்சை தேர்வு செய்துள்ளது. அதன்படி, நியூசிலாந்து அணி பேட்டிங் செய்தது. 

முதல் 10 ஓவர்களில் தொடக்க ஆட்டக்காரர்கள் சிறப்பாக ஆடி ரன்குவிப்பில் ஈடுபட்டனர். 11 ஓவரில் தொடக்க ஆட்டக்காரர் கான்வே 35 ரன்களில் ஆட்டமிழக்க, கேப்டன் வில்லியம்சன் உடன் கைகோர்த்த ரச்சின் பாகிஸ்தான் பந்துவீச்சை சிதறடித்து 108 ரன்களுக்கு ஆட்டமிழந்தார். 

நியூசிலாந்தின் கேப்டன் கேன் வில்லியம்சன் காயத்தில் இருந்து குணமாகி மீண்டும் அணிக்கு திரும்பிய முதல் ஆட்டத்திலேயே, அதிரடியாக ஆடி 95 ரன்களுக்கு ஆட்டமிழந்தார். 

அடுத்து களமிறங்கிய மிட்செல் - 29 ரன்னுக்கும், சாப்மன் - 39 ரன்னுக்கும், க்ளென் பிலிப்ஸ் - 41 ரன்னுக்கும் ஆட்டமிழந்தனர்.

50 ஓவர் முடிவில் நியூசிலாந்து 6 விக்கெட் இழப்பிற்கு 401 ரன்கள் குவித்தது. 402 ரன்கள் எடுத்தால் வெற்றி என்ற இமாலய இலக்குடன் பாகிஸ்தான் அணி களமிறங்கி ஆடி வருகிறது.

இந்த ஆட்டம் இரு அணிகளுக்கும் வாழவா? சாவா? என்ற நிலையில் உச்சகட்ட பரபரப்புடன் நடந்து வருகிறது.