ஆஸ்திரேலிய அணிக்கு எதிரான முதல் ஒருநாள் போட்டியில் இந்திய அணி டாஸ் வென்று பவுலிங் தேர்வு செய்துள்ளது.

இந்தியாவுக்கு சுற்றுப்பயணம் மேற்கொண்டுள்ள ஆஸ்திரேலிய அணி 4 டெஸ்ட் போட்டிகள் மற்றும் 3 ஒரு நாள் போட்டிகள் கொண்ட தொடரில் விளையாடி வருகிறது.

இதில், 4 டெஸ்ட் போட்டிகள் கொண்ட பார்டர் - கவாஸ்கர் டெஸ்ட் தொடரை 2-1 என்ற கணக்கில் இந்திய அணி கைப்பற்றியது. அதனைத் தொடர்ந்து இந்தியா-ஆஸ்திரேலியா அணிகளுக்கு இடையேயான 3 போட்டிகள் ஒருநாள் தொடர் நடைபெற உள்ளது.

இந்த நிலையில் இந்தியா - ஆஸ்திரேலியா அணிகள் மோதும் முதலாவது ஒருநாள் போட்டி இன்று மதியம் 1.30 மணிக்கு மும்பை வான்கடே மைதானத்தில் நடைபெற உள்ளது. இதில் டாஸ் வென்ற இந்திய கேப்டன் ஹார்திக் பாண்டியா பௌலிங் தேர்வு செய்துள்ளார்.

இந்திய அணி

இந்திய அணியின் கேப்டன் ரோஹித் சர்மா இன்று நடைபெறும் முதல் ஒருநாள் போட்டியில் இருந்து தனது சொந்த காரணங்களுக்காக விலகியுள்ளார். அதேபோல், மிடில் ஆர்டர் பேட்ஸ்மேன் ஸ்ரேயஸ் ஐயர் முதுகு வலி காரணமாக ஒரு நாள் தொடரில் இருந்து விலகி உள்ளார். அதன் காரணமாக ரோஹித் சர்மாவுக்கு பதிலாக ஹார்திக் பாண்டியா இந்திய அணிக்கு கேப்டனாக வழிநடத்துகிறார்.

மேலும், இந்திய அணியில் நீண்ட நாட்களுக்கு பிறகு ஜடேஜா, ஷர்துல் தாக்கூர் மற்றும் குல்தீப் யாதவ் அணிக்கு  திரும்பியுள்ளனர்.

ஆஸ்திரேலியா அணி

மேலும், ஆஸ்திரேலியா அணியில் டேவிட் வார்னர் மற்றும் அலெக்ஸ் கேரி விளையாடவில்லை. அலெக்ஸ் கேரிக்கு பதிலாக ஜோஸ் இங்கிலீஷ் விளையாடுகிறார். அதேபோல், டேவிட் வார்னர் இல்லாததால் மிட்செல் மார்ஷ் தொடக்க வீரராக களமிறங்குகிறார்.

அணி விவரம்

இந்திய அணி 11 வீரர்கள் :

ஷுப்மான் கில், இஷான் கிஷன்(வி.கீ), விராட் கோலி, சூர்யகுமார் யாதவ், கே.எல். ராகுல் , ஹர்திக் பாண்டியா (கே), ரவீந்திர ஜடேஜா, ஷர்துல் தாக்கூர், குல்தீப் யாதவ், முகமது ஷமி, முகமது சிராஜ்.

ஆஸ்திரேலியா அணி 11 வீரர்கள் :

டிராவிஸ் ஹெட், மிட்செல் மார்ஷ், ஸ்டீவ் ஸ்மித்(கே), மார்னஸ் லாபுசாக்னே, கிளென் மேக்ஸ்வெல், கேமரூன் கிரீன், மார்கஸ் ஸ்டோனிஸ், ஜோஸ் இங்கிலீஷ் (வி.கீ), சீன் அபோட், ஆடம் ஜம்பா, மிட்செல் ஸ்டார்க்.

இதுவரை நேருக்கு நேர்

இந்தியா ஆஸ்திரேலியா அணிகள் இதுவரை 143 ஒரு நாள் போட்டிகளில் நேருக்கு நேர் மோதியுள்ளன. 80 போட்டிகளில் ஆஸ்திரேலியா அணியும், 53 போட்டிகளில் இந்திய அணியும் வெற்றி பெற்றுள்ளது. 10 போட்டிகளில் முடிவில்லை.