டி20 உலக கோப்பை முதல் அரை இறுதி போட்டியில் நியூசிலாந்து - பாகிஸ்தான் அணிகள் இன்று மோதுகின்றன.

ஐசிசி 8வது டி20 உலகக் கோப்பை ஆஸ்திரேலியாவில் நடைபெற்று வருகிறது. இதில், முதல் சுற்று போட்டிகள் முடிவடைந்த நிலையில், தற்போது சூப்பர் 12 சுற்று போட்டிகளும் இன்றுடன் முடிவடைந்து. அதனைத் தொடர்ந்து அரையிறுதி மற்றும் இறுதி போட்டிகள் நடைபெற உள்ளது.

இதில், குரூப்-1 பிரிவு புள்ளி பட்டியலில் முதல் 2 இடங்களை பிடித்த நியூஸிலாந்து மற்றும் இங்கிலாந்து அணிகள் அரையிறுதிக்கு முன்னேறியுள்ளது.

அதேபோல், குரூப் 2 பிரிவில் புள்ளிப் பட்டியலில் முதல் 2 இடங்களை பிடித்த இந்தியா மற்றும் பாகிஸ்தான் அணிகளும் அரையிறுதிக்கு முன்னேறியுள்ளது.

இந்த நிலையில் இன்று மதியம் 1.30 மணிக்கு  சிட்னி மைதானத்தில்  நடைபெறும் முதல் அரையிறுதி போட்டியில் பாகிஸ்தான் - நியூசிலாந்து அணிகள் மோதுகின்றன.

இரு அணிகளும் சிறப்பான வேக பந்துவீச்சை வைத்துள்ளதால் இன்றைய போட்டியில் அனல் பறக்கும் என எதிர்பார்க்கப்படுகிறது.

டி20 உலகக்கோப்பையில் இதுவரை நேருக்கு நேர்

டி20 உலக கோப்பையில் இவ்விரு அணிகளும் 6 போட்டிகளில் நேருக்கு நேர் மோதியுள்ளன. இதில் 4 போட்டிகளில் பாகிஸ்தான் அணியும், 2 போட்டிகளில் நியூசிலாந்து அணியும் வெற்றி பெற்றுள்ளது.

நாக்-அவுட் போட்டிகளில் இதுவரை

அதுமட்டுமில்லாமல் உலகக் கோப்பையில் (50ஓவர் மற்றும் 20 ஓவர்) பாகிஸ்தான்- நியூசிலாந்து அணிகள் இதுவரை 3 போட்டிகளில் நேருக்கு நேர் மோதியுள்ளன. இதில், 3 போட்டிகளிலும் பாகிஸ்தான் அணி வெற்றி பெற்றுள்ளது குறிப்பிடத்தக்கது.