சென்னையிலிருந்து புறப்பட்ட விமானம்! நடுவானில் வெடிகுண்டு மிரட்டல்! அதிரவைத்த சம்பவம்!

சென்னை விமான நிலையத்தில் இருந்து இன்று காலை மும்பை சென்ற இண்டிகோ நிறுவனத்தின் விமானத்திற்கு நடுவானில் வெடிகுண்டு மிரட்டல் விடுத்த சம்பவம் பரபரப்பை ஏற்படுத்தியுள்ளது.

சென்னை விமான நிலையத்திலிருந்து இண்டிகோ நிறுவனத்தின் ’6இ - 5134’ விமானத்தில், 172 பயணிகளுடன் மும்பை நோக்கி சென்று கொண்டிருந்தது.

நடுவானில் இந்த விமானத்திற்கு வெடிகுண்டு மிரட்டல் விடுக்கப்பட்டதாக மும்பை விமான போக்குவரத்து கட்டுப்பாட்டு அறைக்கு விமானி அவசர தகவல் தெரிவித்துள்ளார்.

இதனை அடுத்து மும்பை விமான நிலையத்திலேயே காலை 8:45 மணிக்கு அவசர அவசரமாக இந்த விமானம் தரையிறக்கப்பட்டது.

மேலும் உடனடியாக விமானத்தில் இருந்த பயணிகள் அனைவரும் வெளியேற்றப்பட்டனர். பின்னர் வெடிகுண்டு சோதனை நிபுணர்கள் மற்றும் விமான நிலையத்தின் பாதுகாவலர்கள் தீவிர சோதனை நடத்தினர்.

இது குறித்து இன்னும் முழுமையான தகவல் வெளிவரவில்லை. இந்த சம்பவம் மும்பை விமான நிலையத்தில் பெரும் பரபரப்பை ஏற்படுத்தியது.

முன்னதாக நேற்று சென்னை ஆளுநர் மாளிகையில் வெடிகுண்டு இருப்பதாக கள்ளக்குறிச்சியை சேர்ந்த நபர் மிரட்டல் விடுத்தது பரபரப்பை ஏற்படுத்தியது குறிப்பிடத்தக்கது.