திண்டிவனம் அருகே ஆட்டோ மீது ஜல்லி ஏற்றிவந்த லாரி மோதிய கொடூர விபத்தில், ஒரே குடும்பத்தைச் சேர்ந்த 4 பேர் பலியான ஆச்சி சம்பவம் அரங்கேறியுள்ளது.

சென்னை, ஊரப்பாக்கம், வ.உ.சி தெருவைச் சேர்ந்தவர் குமரகுரு (வயது 53), மனைவி மஞ்சுளா (வயது 46), மகன் விஜயன் (வயது 29) மற்றும் கோடம்பாக்கம் ஒத்தவாடைத் தெருவைச் சேர்ந்த உறவினர் குருமூர்த்தி (வயது 50) ஆகிய 4 பேரும் மேல்மலையனூர் அங்காளபரமேஸ்வரி அம்மன் கோயிலுக்கு தங்களது சொந்த ஆட்டோவில் இன்று சென்றுள்ளனர்.

சாமி தரிசனம் முடித்துவிட்டு மதியம் 3 மணியளவில் சென்னைக்குத் திரும்பிக் கொண்டிருந்தனர். ஆட்டோவை விஜயன் ஊட்டியதாக சொல்லப்படுகிறது.

சென்னை - திருவண்ணாமலை தேசிய நெடுஞ்சாலையில் தீவனூர் அருகே ஆட்டோ சென்று கொண்டிருந்தபோது, எதிர்புறத்தில் ஜல்லி ஏற்றிவந்த லாரி மீது மோதி விபத்துக்கு உள்ளது.

இந்த கொடூர விபத்தில் குருமூர்த்தி, குமரகுரு, மஞ்சுளா, விஜயன் ஆகியோர் உடல் நசுங்கி நிகழ்விடத்திலேயே கொடூரமாக பலியாகினர்.

விபத்துக் குறித்து தகவலறிந்து வந்த போலீஸார், உயிரிழந்த 4 பேர்களின் சடலங்களையும் மீட்டு பிரேத பரிசோதனைக்காக முண்டியம்பாக்கம் அரசு மருத்துவக் கல்லூரி மருத்துவமனைக்கு அனுப்பி வைத்தனர்.

மேலும், இந்த விபத்து குறித்து வழக்குப்பதிவு செய்த போலீசார், விபத்தை ஏற்படுத்தி விட்டு, லேசான காயங்களுடன் உயிர்பிழைத்து தப்பியோடிய லாரி ஓட்டுநரை தேடி வருகின்றனர்.