சென்னை ஓட்டேரியில் சொந்த மகளை கற்பழிக்க முயன்ற தந்தையை, தாய் அடித்துக் கொன்ற சம்பவம் அதிர்ச்சியை ஏற்படுத்தியுள்ளது.

சென்னை ஓட்டேரி பகுதியை சேர்ந்தவர் பிரதீப் இவருக்கு ப்ரீத்தா என்ற மனைவி உள்ளார். இந்த நிலையில் இவர் தினமும் மது அருந்திவிட்டு வீட்டிற்கு வந்து தனது மனைவி பிரீதா உடன் வாக்குவாதத்தில் ஈடுபட்டு வந்துள்ளார்.

அதே போல் நேற்றும் மது அருந்திவிட்டு வந்த பிரதீப் மதுபோதையில் தனது 20 வயது மகளை பாலியல் வன்கொடுமை செய்ய முயன்றுள்ளார். அதனால் ஆத்திரம் அடைந்த பிரீத்தா மகளை காப்பாற்றுவதற்காக சுத்தியால் தனது கணவனை தாக்கியுள்ளார்.

இதில் பிரதீப் சம்பவ இடத்திலேயே உயிரிழந்துள்ளார். மேலும் இச்சம்பவம் குறித்து தகவலறிந்த ஓட்டேரி காவல்துறையினர் பிரதீப்பின் உடலை கைப்பற்றி பிரேத பரிசோதனைக்கு அனுப்பியதுடன் ப்ரீதாவையும் கைது செய்து விசாரணை செய்துள்ளனர்.

இந்த விசாரணையில் பிரீத்தா மீது இந்திய தண்டனை சட்டப்பிரிவு 302 இன் கீழ் வழக்கு பதிவு செய்யப்பட்டது. மேலும் பிரீத்தா விற்கு தனது கணவனைக் கொல்லும் முன் திட்டம் எதுவும் கிடையாது என்றும் மகளை காப்பாற்ற தற்காப்புக்காக தாக்கினார் என்றும் தெரியவந்துள்ளதால் இந்திய தண்டனை சட்டப்பிரிவு 100 படி தற்காப்பு உரிமையில் இறப்பு என்பதன் கீழ் வழக்குப்பதிவு செய்து  விடுவிக்க போலீசார் முடிவு செய்துள்ளனர்.