விஜய் ஒரு குழந்தை - அமைச்சர் சேகர் பாபு பரபரப்பு பேச்சு..!
minister sekar babu speech about tvk leader vijay
தமிழக வெற்றிக் கழகத்தின் முதல் பொதுக்குழு கூட்டம், சென்னை திருவான்மியூரில் உள்ள தனியார் மண்டபத்தில் நேற்று நடைபெற்றது. இந்தக் கூட்டத்தில் கட்சியின் தலைவர் விஜய் பேசியதாவது:- "இன்று தமிழ்நாடு இருக்கும் சூழலில் நாம் ஒரு புதிய வரலாற்றை படைப்பதற்கு தயாராக வேண்டிய அவசியத்தை நீங்கள் எல்லாரும் நன்றாக புரிந்து வைத்திருப்பீர்கள் என்று நம்புகிறேன்.
ஒவ்வொரு குடும்பமும் நன்றாக வாழ வேண்டும் என்று நினைப்பது அரசியலா? இல்லை, ஒரே ஒரு குடும்பம் மட்டும் தமிழ்நாட்டை சுரண்டி நல்லா வாழ வேண்டும் என்பது அரசியலா? எல்லாருக்கும் நல்லது நடக்க வேண்டும் என்பது தானே அரசியல். அதுதான் நம்ம அரசியலும்.
முத்துவேல் கருணாநிதி ஸ்டாலின் என்று பெயரை மட்டும் வீராப்பாக சொன்னால் போதாது. செயலிலும், ஆட்சியிலும் அதை காட்ட வேண்டும். மத்தியில் பா.ஜனதா ஆட்சியை பாசிச ஆட்சி என்று அறைகூவல் விடுத்துவிட்டு, இங்கு நீங்கள் பண்ணுகிற ஆட்சி மட்டும் என்னவாம்? அதற்கு கொஞ்சம் கூட குறைவில்லாத அதே பாசிச ஆட்சி தானே.
மன்னராட்சி முதல்வரே, உங்கள் ஆட்சியை பற்றி கேட்டால், உங்களுக்கு ஏன் இவ்வளவு கோபம் வருகிறது. நீங்கள் ஒழுங்காக ஆட்சி நடத்தி இருந்தால் பெண்கள் பாதுகாப்பு ஒழுங்காக இருந்திருக்கும். சட்டம்-ஒழுங்கு சரியாக இருந்திருக்கும். படிக்கிற பிள்ளைகள், சின்னப் பொண்ணுங்க, வேலைக்கு போகிற பொண்ணுங்க, வீட்டில் இருக்கிற பொண்ணுங்க என்று இவர்கள் எல்லாருக்கும் நடக்கிற கொடுமைகளை சொல்ல முடியவில்லை சார்.
2026-ம் ஆண்டு தமிழ்நாடு இதுவரை சந்திக்காத ஒரு வித்தியாசமான தேர்தலை சந்திக்கும். இரண்டே இரண்டு பேருக்கு நடுவில் தான் போட்டியே. ஒன்று த.வெ.க. இன்னொன்று தி.மு.க." என்று அவர் கூறியிருந்தார்.
இந்த நிலையில் விஜய்யின் பேச்சுக் குறித்து இன்று செய்தியாளர்களிடம் பேசிய அமைச்சர் சேகர்பாபு, "மன்னராட்சி காத்த கரங்கள், மக்களாட்சி காணும் எங்கள் நெஞ்சம். எங்களாட்சி என்றும் ஆளும். சக்திமயமான இந்த ஆட்சியை எந்த சக்தியாலும் அகற்ற முடியாது. பெண்கள் தான் 2026-ஆம் ஆண்டு இந்த ஆட்சியை தூக்கி பிடிப்பார்கள். முதலமைச்சரை வரவேற்பதில் 80 சதவீதம் பெண்கள் தான் உள்ளனர். த.வெ.க. தலைவர் விஜய், ஒரு தவழ்கின்ற குழந்தை. நாங்கள் பி.டி.உஷா போன்று பல்வேறு ஓட்டப்பந்தயங்களில் பங்கேற்று வென்றவர்கள்" என்று தெரிவித்தார்.
English Summary
minister sekar babu speech about tvk leader vijay