தஞ்சாவூர் சாஸ்த்ரா பல்கலையில் பொறியியல் சேர்க்கைக்கான தரவரிசைப் பட்டியல் வெளியீடு.!!

தஞ்சாவூர் சாஸ்த்ரா நிகர்நிலைப் பல்கலைக்கழகத்தில் நடப்பாண்டின் பொறியியல் சேர்க்கைக்கான தரவரிசைப் பட்டியல் வெளியிடப்பட்டுள்ளது. இது தொடர்பாக சாஸ்த்ரா பல்கலைக்கழகம் வெளியிட்ட செய்திக்குறிப்பில், "சாஸ்த்ரா பல்கலைக்கழகத்தில் எந்தவிதமான நுழைவுத் தேர்வையும் நடத்தாமல், ஜேஇஇ மெயின் மற்றும் பன்னிரெண்டாம் வகுப்பு மதிப்பெண்களை இணைத்து அதன் அடிப்படையில் மாணவர் சேர்க்கை நடத்தப்படுகிறது. 

இதுபோன்ற மாணவர் சேர்க்கையை நடத்தும் ஒரே நிகர்நிலை பல்கலைக்கழகம் என்றால் அது சாஸ்த்ரா பல்கலைக்கழகம் மட்டுமே. இந்தப் பல்கலைக்கழகத்தில் நடப்பாண்டுக்கான சேர்க்கை விண்ணப்பங்கள் கடந்த 24-ம் தேதி வரை பெறப்பட்டு அன்றே தரவரிசைப் பட்டியல் வெளியிடப்பட்டது. 

தரவரிசைப் பட்டியலின் முதல் பிரிவில் தேசிய அளவில் ஆந்திரா மாநிலத்தைச் சேர்ந்த தினேஷ் மணிதீப் முதலிடமும், அதே மாநிலத்தைச் சேர்ந்த சப்பிடி குலதீப் ரெட்டி இரண்டாமிடமும் பெற்றுள்ளனர். 

அதேபோல் இரண்டாம் பிரிவில் கேரளா மாநிலத்தைச் சேர்ந்த எம்.அபிகித் தேசிய அளவில் முதலிடமும், தமிழகத்தில் திருச்சியைச் சேர்ந்த ரோஷினி பானு இரண்டாம் இடமும் பெற்றுள்ளனர்" என்றுத் தெரிவித்துள்ளது.