விழுப்புரம் மாவட்டத்தில் உள்ள, விக்கிரவாண்டி வி.சாலையில் இன்று நடிகர் விஜய் தொடங்கியுள்ள தமிழக வெற்றிக் கழகத்தின் முதல் மாநாடு பிரம்மாண்டமாக நடைபெற உள்ளது.

இதற்காக உருவாக்கப்பட்ட மாநாட்டு திடலில் அதிகாலை முதலே பல்வேறு பகுதிகளில் இருந்து தொண்டர்கள் குவிந்து வருகின்றனர். அதன் படி, சென்னையில் இருந்து ஏராளமானோர் மாநாட்டில் கலந்துக் கொள்வதற்காக அதிகாலையிலேயே புறப்பட்டு வந்துள்ளனர்.

இந்த நிலையில், சென்னையில் இருந்து தவெக மாநாட்டிற்கு புறப்பட்ட தொண்டர்கள் விபத்தில் சிக்கியுள்ள சம்பவம் பெரும் சோகத்தை ஏற்படுத்தியுள்ளது. அதாவது, சென்னை தேனாம்பேட்டையில் இருசக்கர வாகனம் மீது அடையாளம் தெரியாத வாகனம் மோதி விபத்து ஏற்பட்டுள்ளது.

இதில், ஒருவர் சம்பவ இடத்திலேயே உயிரிழந்த நிலையில், மற்றொருவர் படுகாயம் அடைந்துள்ளார். இதைப்பார்த்த அக்கம் பக்கத்தினர் உடனே போலீஸாருக்குத் தகவல் தெரிவித்துள்ளனர். அதன் படி போலீசார் விரைந்து வந்து படுகாயமடைந்தவரை மீட்டு சிகிச்சைக்காக மருத்துவமனைக்கு அனுப்பி வைத்தனர்.

பின்னர் உயிரிழந்தவரின் உடலை மீட்டு பிரேதபரிசோதனைக்காக மருத்துவமனைக்கு அனுப்பி வைத்துள்ளனர். தொடர்ந்து போலீசார் விபத்து குறித்து விசாரணை நடத்தி வருகின்றனர். விபத்தில் சிக்கியவர்களது கையில் தவெக கொடி இருந்துள்ளது குறிப்பிடத்தக்கது.