அமெரிக்காவில் அதிகார மாற்றம்!...13-ம் தேதி ஜோ பைடன் - ட்ரம்ப் இடையே சந்திப்பு!

அமெரிக்க அதிபர் தேர்தலில், 538 இடங்களில் குடியரசு கட்சி வேட்பாளரும், அமெரிக்க முன்னாள் அதிபருமான ட்ரம்ப் 248 வாக்குகள் பெரும்பான்மை பெற்று வெற்றி பெற்றுள்ளார். தொடர்ந்து அமெரிக்காவின் 47வது அதிபராக ட்ரம்ப் பதவியேற்க உள்ளார்.

இதற்கிடையே, டிரம்பின் பிரசார மேலாளராக இருந்து வந்த சூசி வைல்ஸ் அமெரிக்க வெள்ளை மாளிகையின் தலைமை அதிகாரியாக நியமனம் செய்யப்பட்டுள்ளார்.

மேலும், ட்ரம்பிற்கு தற்போதைய அமெரிக்க அதிபர் ஜோ பைடன், வாழ்த்து தெரிவித்து இருந்த நிலையில், அதிகார மாற்றத்தை சுமுகமாக நிறைவேற்றுவது குறித்து விவாதிக்க வெள்ளை மாளிகைக்கு வருமாறு அழைப்பு விடுத்தார். மேலும், அதிகார மாற்றம் அமைதியான முறையில் நடைபெறும் என்றும் தெரிவித்து இருந்தார்.

அந்த வகையில், ட்ரம்ப் வரும் 13-ம் தேதி வெள்ளை மாளிகை செல்ல உள்ளதாக தெரிவிக்கப்பட்டு உள்ளது. வெள்ளை மாளிகையில் உள்ள ஓவல் அலுவலகத்தில் இருவரும் சந்தித்து பேச உள்ளதாக வெள்ளை மாளிகை தெரிவித்துள்ளது. அமெரிக்க அதிபராக டிரம்ப் வெற்றி பெற்ற பிறகு ஜோ பைடனை சந்திப்பது இது முதல் முறை என்பது குறிப்பிடத்தக்கது.