அமெரிக்காவின் குடியேற்றக் கொள்கையில் டிரம்ப் நிர்வாகம் கடுமையான நடவடிக்கைகளை மேற்கொண்டு வரும் நிலையில், வெளிநாட்டு தொழில்நுட்ப ஊழியர்கள் மத்தியில் மிகுந்த கவலையும் குழப்பமும் ஏற்பட்டுள்ளது. குறிப்பாக H-1B மற்றும் கிரீன் கார்டு போன்ற விசாக்களுக்கு எதிராக நிராகரிப்பு விகிதங்கள் அதிகரிக்கலாம் என்ற அச்சம் நிலவுகிறது.

விசா சிக்கல்களை முன்னிட்டு அமேசான், கூகுள், ஆப்பிள், மைக்ரோசாப்ட் உள்ளிட்ட முன்னணி தொழில்நுட்ப நிறுவனங்கள், தங்களுடைய விசா வைத்திருக்கும் ஊழியர்களை அமெரிக்காவிலிருந்து வெளிநாட்டிற்குப் பயணிக்க வேண்டாம் என அறிவுறுத்தியுள்ளன. ஒரு முறை நாட்டைவிட்டு வெளியே சென்றால், மீண்டும் நுழைவதில் தடைகள் ஏற்படக்கூடும் என அச்சம் நிலவுகிறது.

வாஷிங்டன் போஸ்ட் வெளியிட்டுள்ள அறிக்கையின்படி, சில தொழில்நுட்ப ஊழியர்கள் இந்தியா செல்ல இருந்த பயணத் திட்டங்களை ரத்து செய்துள்ளதாகத் தெரிவித்துள்ளனர். “நாங்கள் எங்கு சென்றாலும் எங்கள் ஆவணங்களை எடுத்துச் செல்கிறோம்” என்று ஒருவர் கூற, “அமெரிக்க குடிமகனாக இல்லாத அனைவரும் இங்கு சட்டவிரோதமாக இருக்கலாம் என்ற எண்ணம் உருவாகி விட்டது” என மற்றொருவர் கூறியுள்ளார்.

சான் பிரான்சிஸ்கோவை தளமாகக் கொண்ட கோஷ்ல் லா நிறுவனத்தின் வழக்கறிஞர் மால்கம் கோஷ்ல் கூறுகையில், “தற்போது நிலவும் சூழல் முழுக்க கவலை மற்றும் பயமே. அடுத்ததாக என்ன நடக்கப்போகிறது என்பது குறித்து எங்களால் ஊகிக்க முடியவில்லை. நிர்வாக நடவடிக்கைகள் மேலும் தீவிரமாவதாகத் தெரிகிறது” என தெரிவித்துள்ளார்.

இந்த விவகாரம், குடியேற்றத்தைக் குறைக்கக் கோரும் டிரம்ப் ஆதரவாளர்களுக்கும், திறமையான வெளிநாட்டு பணியாளர்களை அமெரிக்கா வரவேற்க வேண்டும் என்று வாதிடும் தொழில்நுட்பத் தலைவர்களுக்கும் இடையே மோதலையும் ஏற்படுத்தியுள்ளது. கடந்த டிசம்பரில் X (முந்தைய ட்விட்டர்) தளத்தில் இதுபற்றி கடும் விவாதங்கள் நடைபெற்றன.

முகாமைத்துவ நிபுணர் எலான் மஸ்க், “அமெரிக்கா ஒரு தொழில்முறை விளையாட்டு அணியைப் போல இருக்க வேண்டும். சிறந்த திறமையுள்ளவர்களை எங்கிருந்தாலும் சேர்க்க வேண்டும்” என்று தெரிவித்தார்.

2025ஆம் ஆண்டிற்கான USCIS (அமெரிக்க குடியுரிமை மற்றும் குடியேற்ற சேவை) தரவுகளின்படி, அமேசான் நிறுவனமே 9,265 H-1B விசா அனுமதிகளைப் பெற்று முதலிடத்தில் உள்ளது. அதனைத் தொடர்ந்து காக்னிசண்ட் (6,321), கூகுள் (5,364), மெட்டா, டெஸ்லா, ஆப்பிள், மைக்ரோசாப்ட், ஐபிஎம் உள்ளிட்ட நிறுவனங்களும் குறிப்பிடத்தக்க எண்ணிக்கையிலான அனுமதிகளைப் பெற்றுள்ளன.

இந்த நிலைமை அமெரிக்காவில் வாழும் இந்திய தொழில்நுட்ப ஊழியர்கள் மற்றும் புலம்பெயர்ந்த தொழிலாளர்களுக்கு எதிர்காலத்தில் பெரும் நெருக்கடிகளை உருவாக்கக்கூடியது என நிபுணர்கள் எச்சரிக்கின்றனர்.