வாஷிங்டன்: சமூக வலைத்தள உலகில் முக்கிய இடம் வகிக்கும் மெட்டா (முன்னைய பேஸ்புக்) நிறுவனத்துக்கு எதிராக அமெரிக்காவின் பெடரல் டிரேட் கமிஷன் (FTC) தாக்கல் செய்துள்ள முக்கிய வழக்கு இன்று தொடங்குகிறது. இதில், மெட்டா நிறுவனம் போட்டியை நசுக்கும் நோக்கத்துடன் இன்ஸ்டாகிரம் மற்றும் வாட்ஸ்அப் போன்ற நிறுவனங்களை கைப்பற்றியதாக FTC குற்றம் சாட்டியுள்ளது.

FTC தனது புகாரில், மெட்டா நிறுவனம் 2012-ஆம் ஆண்டு $1 பில்லியனுக்கு இன்ஸ்டாகிரமையும், 2014-ஆம் ஆண்டு $22 பில்லியனுக்கு வாட்ஸ்அப்பையும் கையகப்படுத்தியிருப்பது, சமூக வலைத்தள சந்தையில் தனது ஆதிக்கத்தை நிலைநிறுத்தும் ஒரு நீண்டகால திட்டத்தின் ஒரு பகுதியாகவே உள்ளதாக கூறுகிறது. இதனால் வளர்ந்து வரும் போட்டி அழிக்கப்பட்டு விட்டதாகவும் FTC வாதிடுகிறது.

மெட்டா நிறுவனம் தனது சொந்தமாக போட்டியிடும் தயாரிப்புகளை உருவாக்க முடியாத நிலையில், நேரத்தை "வாங்கும்" வகையில், போட்டியாளர்களையே வாங்கியது எனவும் புகாரில் குறிப்பிடப்பட்டுள்ளது. நிறுவன தலைவர் மார்க் சக்கர்பெர்க் அவர்களின் உள்மின்னஞ்சல் மேற்கோளாக காட்டப்பட்டுள்ளது. அதில், “போட்டியிடுவதைவிட வாங்கிவிடுவது சிறந்தது” எனக் கூறியிருப்பது, FTC-க்கு ஆதாரமாக உள்ளது.

இந்த வழக்கை விசாரிக்கிற நீதிபதி ஜேம்ஸ் போஸ்பெர்க், முதலில் மெட்டா தனிப்பட்ட சமூக வலைப்பின்னல் சந்தையில் ஏகபோக ஆதிக்கம் செலுத்துகிறதா என்பதைக் குறிப்பிட உள்ளார். YouTube மற்றும் TikTok போன்ற தளங்கள், காணொளி சார்ந்த உள்ளடக்கங்களை முன்னிலைப்படுத்துவதால், அவை இந்த சந்தையில் வராது என FTC வாதிடுகிறது.2012 முதல் 2020 வரை இந்த சந்தையில் மெட்டா 80% பயனர் நேரத்தை பிடித்திருப்பதாகவும் FTC கூறுகிறது.

மெட்டா தரப்பு, FTC வாதங்களைத் திட்டவட்டமாக மறுக்கிறது. “TikTok, YouTube போன்றவை வலுவான போட்டியாளர்கள்; நுகர்வோர் பாதிக்கப்பட்டதற்கோ, விளம்பரதாரர்கள் பாதிக்கப்பட்டதற்கோ ஆதாரம் இல்லை,” என மெட்டாவின் வழக்கறிஞர்கள் கூறியுள்ளனர். மேலும், இந்த செயலிகள் மெட்டாவின் முதலீடுகள் இல்லாமல் வளர்ச்சி அடைந்திருக்க முடியாது என்றும் அவர்கள் வலியுறுத்துகிறார்கள்.

வழக்கு நீடித்தால், இன்ஸ்டாகிரம் மற்றும் வாட்ஸ்அப்பை விற்க மெட்டா கட்டாயப்படுத்தப்படும் வாய்ப்பு உள்ளது. இது தொழில்நுட்பத் துறையில் ஒரு முக்கிய திருப்புமுனையாக அமையும். நீதிமன்றம் விற்பனையை மேற்பார்வையிட அறங்காவலர் நியமிக்க வாய்ப்பு உள்ளது.

இந்த வழக்கு, முன்னாள் ஜனாதிபதி டொனால்ட் ட்ரம்ப் ஆட்சிக் காலம் முடிவில் தொடங்கப்பட்டது. தற்போது FTC தலைவர் ஆண்ட்ரூ பெர்குசன் தலைமையில் வழக்கு தொடர்கிறது. சமரச முயற்சிகள் நடைபெற்றாலும், இதுவரை எந்த உடன்பாடும் எட்டப்படவில்லை.

FTC உறுப்பினரான ரோஹித் சோப்ரா, “வழக்கு விசாரணை தொடர வேண்டும்; குற்றச்சாட்டுகளை நிரூபிக்கும் ஆதாரங்கள் உள்ளன,” எனத் தெரிவித்துள்ளார்.

இந்த வழக்கில் தீர்ப்பு மெட்டாவுக்கு எதிராக வருமானால், அந்த நிறுவனம் தனது முக்கியமான வருமான ஆதாரமான இன்ஸ்டாகிராமை இழக்கும் அபாயம் உள்ளது. இது மார்க் சக்கர்பெர்க் தலைமையிலான மெட்டா நிறுவனத்துக்கே ஒரு பெரிய சவாலாக அமைந்துள்ளது.

இந்த வழக்கு முடிவில், சமூக வலைத்தளங்களின் எதிர்காலம், தொழில்நுட்ப நிறுவனங்களின் வளர்ச்சி உத்திகள் மற்றும் நிபுணர்களின் முதலீட்டு பார்வையிலும் பெரும் மாற்றம் ஏற்படலாம்.