தமிழகத்தில் சமீபத்தில் பூண்டு விலை கடுமையாக உயர்ந்து வருவதால் பொதுமக்கள் மற்றும் உணவகங்கள் கவலையடைந்துள்ளன. தமிழகத்தின் பிரதான காய்கறி சந்தையான கோயம்பேடு மார்க்கெட்டில் தற்போது ஒரு கிலோ பூண்டு ரூ.380க்கு விற்பனை செய்யப்படுகிறது. 

வெங்காயம் மற்றும் பூண்டு தமிழகத்தின் சமையல் கலாச்சாரத்தில் மிக முக்கியமான பங்கு வகிக்கின்றன. குறிப்பாக, பிரியாணி போன்ற பல்வேறு உணவுப் பொருட்களில் அவற்றின் பயன்பாடு அதிகமாக உள்ளது. பூண்டு தட்டுப்பாடு காரணமாக அதன் விலை உயர்வது, சமையல் பொருட்களை குறைந்த விலையில் வாங்க முடியாத நிலையில் மக்கள் எதிர்கொள்ளும் சவாலாக அமைந்துள்ளது.

மத்திய அரசின் புள்ளிவிவரங்களின்படி, பூண்டு உற்பத்தியில் மத்திய பிரதேசம், ஆண்டுக்கு 18.49 லட்சம் டன் பூண்டு உற்பத்தி செய்து முதலிடத்தில் உள்ள நிலையில், தமிழகம் 7,150 டன் மட்டுமே உற்பத்தி செய்கிறது. அதனால், தமிழகத்தின் பூண்டு தேவையை பூர்த்தி செய்ய வடமாநிலங்களான மத்திய பிரதேசம் மற்றும் ராஜஸ்தானிலிருந்து பூண்டு இறக்குமதி செய்யப்படுகிறது. அந்த மாநிலங்களில் இருந்து வந்த பூண்டு கோயம்பேடு சந்தையில் அதிக விலையில் விற்கப்படுகிறது, மேலும் இதற்கான போக்குவரத்து செலவுகளும் பூண்டு விலையை உயர்த்துகிறது.

கோயம்பேடு சந்தையின் பூண்டு விற்பனையாளர்கள் கூறியதாவது: "பூண்டில் பொடி, பூனா லட்டு, லட்டு, முதல்தரம் என பல வகைகள் உள்ளன. இவற்றில், பொதுவான பொடி வகை பூண்டு தற்போது ரூ.205-240க்கு விற்கப்படுகிறது. லட்டு வகை ரூ.330-380க்கு, மேலும் முதல்தரம் பூண்டு ரூ.440-500க்கு விற்கப்படுகிறது," என தெரிவித்தனர். பூண்டு விலை உயர்வு ஜனவரி மாதம் வரை நீடிக்கும் எனவும் நிபுணர்கள் கணிக்கின்றனர்.