இந்தியாவின் முன்னணி கார் உற்பத்தியாளரான மாருதி சுசுகி, அடுத்த இரண்டு ஆண்டுகளில் பல புதிய மாடல்களை சந்தையில் அறிமுகப்படுத்த தயாராகி வருகிறது. அதிக மைலேஜ் தரும் ஹைப்ரிட் எஸ்யுவிக்கள், சுற்றுச்சூழலுக்கு உகந்த மின்சார வாகனங்கள் மற்றும் ஏற்கனவே வெற்றிகரமாக உள்ள மாடல்களின் புதிய தலைமுறை பதிப்புகள் ஆகியவை இதில் அடங்கும். புதிய கார் வாங்க திட்டமிட்டுள்ளவர்களுக்கு, சிறிது காலம் காத்திருப்பது சிறந்த முடிவாக இருக்கும்.

2025ஆம் ஆண்டு இரண்டாம் பாதியில், மாருதி சுசுகி கிராண்ட் விட்டாரா எஸ்யுவியின் மூன்று வரிசை இருக்கை கொண்ட பதிப்பை அறிமுகப்படுத்தும். தற்போதைய 5 சீட்டர் பதிப்பை விட நீளமான இந்த புதிய மாடல், கூடுதல் இருக்கை வசதியுடன் வருகிறது. லெவல் 2 ADAS தொழில்நுட்பம் மற்றும் சில புதிய அம்சங்களும் இதில் சேர்க்கப்படுகின்றன. இதற்காக 1.5 லிட்டர் மைல்ட் மற்றும் ஸ்ட்ராங் ஹைப்ரிட் பவர்டிரெய்ன்கள் வழங்கப்படும்.

மாருதியின் முதல் மின்சார வாகனமாக eVitarra விரைவில் அறிமுகமாக இருக்கிறது. தேர்ந்தெடுக்கப்பட்ட நெக்ஸா டீலர்களில் முன்பதிவுகள் ஏற்கனவே துவங்கியுள்ளன. இரண்டு பேட்டரி விருப்பங்களுடன், 500 கிலோமீட்டர் மேல் MIDC சான்றளிக்கப்பட்ட பயண தூரத்தை வழங்கும் என மாருதி உறுதிப்படுத்தியுள்ளது.

2026இல், மாருதி சுசுகி ஃப்ரோங்ஸ் கிராஸ்ஓவர் மாடலில் ஸ்ட்ராங் ஹைப்ரிட் பதிப்பை அறிமுகப்படுத்தும். ஸ்விஃப்ட் Z12E 1.2 லிட்டர் பெட்ரோல் எஞ்சின் மற்றும் சீரிஸ் ஹைப்ரிட் அமைப்புடன் இது வழங்கப்படும். 35 கி.மீக்கு மேல் மைலேஜ் பெறும் இந்த மாடல், அதன் பெட்ரோல் பதிப்பை விட விலை உயர்ந்ததாக இருக்கும்.

மாருதி பலேனோ ஹேட்ச்பேக் 2026இல் புதிய தலைமுறை வடிவத்தில் அறிமுகமாகும். இது ஸ்ட்ராங் ஹைப்ரிட் தொழில்நுட்பத்துடன், புதிய வடிவமைப்பு மாற்றங்கள் மற்றும் மேம்படுத்தப்பட்ட அம்சங்களுடன் வருவதாக எதிர்பார்க்கப்படுகிறது. தற்போதைய பெட்ரோல் மற்றும் CNG விருப்பங்களும் தொடரும்.

மாருதி, சுசுகி eWX கான்செப்டை அடிப்படையாகக் கொண்டு ஒரு புதிய எலக்ட்ரிக் ஹேட்ச்பேக்கை இந்திய சந்தையில் கொண்டு வர உள்ளது. இது Tata Tiago EVக்கு நேரடி போட்டியாக அமையும். சிறிய திறன் கொண்ட பேட்டரி பேக்குடன் வழங்கப்படும் என எதிர்பார்க்கப்படுகிறது.

மாருதி சுசுகி, ஜப்பானில் பிரபலமான Spacia மாடலை அடிப்படையாகக் கொண்டு ஒரு சிறிய MPVயை அறிமுகப்படுத்தும் திட்டத்தில் உள்ளது. இது Renault Triber மற்றும் எதிர்பார்க்கப்படும் Nissan MPVக்கு போட்டியாக அமையும். Swift ஹேட்ச்பேக்கின் 1.2 லிட்டர் பெட்ரோல் எஞ்சினை பகிர்ந்து கொள்ளும் வாய்ப்பு உள்ளது.

மாருதி சுசுகி, இந்திய வாகன சந்தையில் தனது ஆதிக்கத்தை நிலைநாட்டுவதற்காக ஹைப்ரிட், மின்சார மற்றும் புதிய தலைமுறை மாடல்களுடன் முழுவீச்சில் தயாராகி வருகிறது. புதிய வாகனங்களை நோக்கி எதிர்பார்ப்பு ஏற்கனவே அதிகரிக்கத் தொடங்கியுள்ளது.